ottura asiya-amérika dölet bashliqliri yighini chaqirildi
tunji nöwetlik ottura asiya-amérika dölet bashliqliri yighini amérika qoshma ishtatlirining nyu york shehiride chaqirildi.
türkiye awazi radiyosi xewiri: amérika qoshma ishtatlirining nyu york shehiride «C5 + 1» formatsiyesidiki tunji nöwetlik ottura asiya-amérika dölet bashliqliri yighini chaqirildi.
amérika qoshma ishtatliri pirézidénti jo baydinning sahibxanliqida chaqirilghan yighingha qazaqistan pirézidénti qasim jomert toqayéw, qirghizistan pirézidénti sadir japparow, özbékistan pirézidénti shewket mirziyoyéw, tajikistan pirézidénti imam eli raxman we türkmenistan pirézidénti serdar berdimuhemmedow qatnashti.
rehberler tunji qétim chaqirilghan bashliqlar yighinida, «C5 + 1» formatsiyesidiki diyalog dairiside iqtisad, énérgiye we bixeterlik saheliride ottura asiyaning igilik hoquqi, muqimliqi we parawanliqini téximu kücheytish üchün ortaq xizmet ishlesh mesililirini muzakire qildi.
bashliqlar yighinida, istratégiyelik hemkarliq, siyasiy diyalog, soda, iqtisad, meblegh sélish we insaniy hemkarliqini yenimu tereqqiy qildurushqa munasiwetlik köz - qarashlar, shundaqla yawroasiyaning tinchliqi we muqimliqini qoghdash mesililiri tepsiliy muzakire qilindi.
buningdin 8 yil ilgiri semerqentte diplomatiye ministirliri sewiyeside tesis qilinghan «C5 + 1» formatsiyesidiki diyalogning dölet bashliqliri sewiyesige yetküzülüp, ottura asiya döletliri bilen amérika otturisida her sahede ochuq we ijabiy diyalog hem ünümlük hemkarliqni tereqqiy qildurushtiki muhim munberge aylandurulghanliqi qeyt qilindi.
rehberler ottura asiya döletliri bilen amérika otturisidiki iqtisadiy hemkarliq, tor bixeterliki, térrorizm, zorawanliq, qanunsiz köchmenler we zeherlik chékimlik etkeschiliki qatarliq bixeterlik xirislirini hel qilishta hemkarliqni kücheytishke munasiwetlik mesililer toghrisida muzakire élip bardi.
qazaqistan pirézidénti qasim jomert toqayéw yighinda qilghan sözide, birleshken döletler teshkilatining almutada ottura asiya we afghanistandiki sijil tereqqiyat nishanliri merkizi qurushta amérika qoshma ishtatlirining qollishigha ishinidighanliqlirini bayan qildi.
özbékistan pirézidénti shewket mirziyoyéw soda we meblegh sélish paaliyetlirini kücheytish, layihe hemkarliqi ornitish, rayonda qatnash karidorlirini échish, kishilik hoquqqa kapaletlik qilish, maarip pirogrammilirini keng omumlashturush, afghanistan mesilisini tinch hel qilishqa yardem bérish qatarliq mesililerning nahayiti muhimliqini tekitlidi.
qirghizistan pirézidénti sadir japparow, bashliqlar yighinining özara chüshinish, ishenchni kücheytish, bixeterlik, muqimliqqa kapaletlik qilish, soda - iqtisadiy hemkarliqni kéngeytish üchün paydiliq sharait hazirlap bérishning zörürlükini eskertip mundaq dédi: «<C5 + 1> formatsiyesidiki diyalognimu öz ichige alghan amérika bilen bolghan hemkarliq qirghizistanning diplomatiye siyasitining muhim sahelirining biri.»
tajikistan pirézidénti imam eli raxman künséri küchiyiwatqan xirislar, tehditler, térrorizm, esebiylik we zeherlik chékimlik etkeschilikige qarshi küresh, rayon bixeterlikige kapaletlik qilish, afghanistanning siyasiy weziyiti, tajikistanning afghanistan bilen bolghan chégra liniyelirini qoghdash qatarliq mesililer heqqide toxtilip, bu jeryanda xelqaraliq qollash we hemkarliqning muhimliqini tekitlidi.
yighin axirida, ottura asiya döletliri bilen amérika qoshma ishtatliri otturisida özara chüshinishni chongqurlashturush we ijabiy hemkarliqni kéngeytish toghrisida kélishim hasil qilindi.
مۇناسىۋەتلىك خەۋەرلەر
ezerbeyjan – erméniye tinchliq söhbiti bashlandi
ezerbeyjan bilen erméniye otturisidiki tinchliq söhbiti qazaqistanning almata shehiride bashlandi.
ezerbeyjan bash ministiri türkiyede ziyarette bolmaqta
ezerbeyjan bash ministiri eli esedof türkiyede dölet ishliri ziyaritide bolmaqta.
özbékistan bilen wéngiriye erkin iqtisadiy rayon quridu
özbékistanda wéngiriye we yawropa shirketliri üchün alahide erkin iqtisadiy rayon qurulidu.