kiyéwda 3 – nöwetlik qirim munbiri bashliqlar yighini chaqirildi

türkiye awazi radiyosi xewiri: ukraina tashqi ishlar ministiri dimitro kulébaning riyasetchilikide kiyéwdiki bir méhmanxanida ötküzülgen bashliqlar yighinigha, ukraina pirézidénti wolodimir zélénskiy, portugaliye pirézidénti marsélo rébélbo dé susa, litwaniye pirézidénti gitanas nauséda, wéngiriye pirézidénti katalin kowak, qirim tatarliri rehbiri mustafa abdulljémil qirimoghlu we bashqa köp sanda kishi teklip bilen qatnashti.

türkiyege wakaliten jumhur reislik mehkimisi bash meslihetchisi bash elchi akif chaghatay qilich qatnashqan yighinda, firansiye pirézidénti émmanuél makron, polsha pirézidénti andrézéj duda, latwiye pirézidénti édgars rinkéwichs, éstoniye pirézidénti alar karis we köpligen döletlerning rehberliri yollighan sinliq bayanatlar élan qilindi.

türkiye jumhur reisi rejep tayyip erdoghanmu 3 – nöwetlik qirim munbiri bashliqlar yighinigha sinliq bayanat yollap, türkiyening qirim tatarlirini dawamliq qollaydighanliqlirini ipadilidi.

ukraina pirézidénti wolodimir zélénskiy yighinda qilghan sözide, qirim munbiri yighinining nahayiti muhimliqini tekitlep mundaq dédi: «bu yilqi qirim munbiri yighinigha yawropa, asiya, amérika we afriqadin kelgen 63 dölet hemde xelqaraliq teshkilatlarning wekilliri qatnashti. bu yighingha qatnashquchilar sanining yilséri köpiyishi rusiyening qirimni bésiwélishining xelqara qanungha xilap, shundaqla insaniyetke qarshi jinayet ikenliki toghrisida pütkül dunyaning ortaq tonushqa ige ikenlikining eng roshen namayendisi, elwette.»

qirim tatar türk xelqining rehbiri, ukraina parlamént ezasi mustapa abduljémil qirimoghlumu 2014-yili rusiye teripidin bésiwélinghan qirimning azad qilinishi kéreklikini tekitlep mundaq dédi: «zéminimizning ishghaliyettin azad qilinidighanliqi we ukrainaning zémin pütünlükige sozulghan qollarning choqum sunidighanliqigha chin dilimizdin ishinimiz.»

wéngriye pirézidénti katalin nowak mundaq dédi: «biz ukraina terepte turup, éniq pozitsiye bildürüshimizge we rusiyening sewebsiz tajawuzchiliqini eyiblishimizge éhtiyajliqmiz.»

italiye bash ministiri giorgiya méloni qirim munbiri bashliqlar yighinigha ewetken sinliq bayanatida, gherbning 2014-yili yüz bergen ishlarni toluq chüshinelmigenlikini ilgiri sürüp mundaq dédi: «gherb 2014-yili gherbte yüz bergen ishlarni toluq chüshinelmidi, belkim gherb moskwaning jahangirlik herikitining bu yerde toxtap qélishini ümid qilghan bolushi mumkin. biz xatalashqan iduq, shunga bu xataliqimizni étirap qilishimiz kérek.»

litwaniye, latwiye, éstoniye, polsha we finlandiye rehberlirimu qirim dewasini qollaydighanliqlirini bildürüshti.