қирғизистанда сийасий өзгириш қозғашқа тәййарлиниватқан бир қисим кишиләр қолға елинди

түркийә авази радийоси хәвири: қирғизистан дөләт хәвпсизлики комитети тәрипидин елан қилинған байанатта билдүрүлүшичә, қирғизистанда мәмликәт бойичә кәң көләмлик наразилиқ намайиши өткүзүш, зор көләмлик исйан көтүрүш арқилиқ зорлуқ билән һакимийәтни тартивелиш үчүн мәхпи тәййарлиқ қиливатқан бир түркүм шәхсләрниң қанунсиз паалийәтлири ениқланған.

сот мәһкимисиниң қарари бойичә қолға чүшүрүлгән мәлуматлар вә йиғивелинған үн – син материйаллириға асасән бир қатар тәкшүрүшләр башланған.

байанатта тәкитлинишичә, тәкшүрүш давамида 30 дин артуқ киши қолға елинған. сийасий өзгириш қозғаш тәшәббусиниң башламчиси әлдик кәнәш (хәлқ мәҗлиси) партийәсиң рәһбири роза нурматова билән бирликтә төт паалийәтчи қолға елинған.  

тәкшүрүшләр давамида, мәзкур җинайәт тәшкилатниң узундин буйан адәм топлаш үчүн паалийәт елип барғанлиқи, мәзкур сийасий партийә рәһбириниң һакимийәтни зорлуқ билән тартивелиш пилани түзүп, давамлиқ мәхпий йиғилишларни тәшкиллигәнлики, бу тәшкилий гуруппа әзалириниң дөләтниң охшимиған җайлиридин кәлгән 100 дин артуқ кишидин тәшкил тапидиғанлиқи ениқланған.

байанатта мундақ дейилгән: «мәзкур җинайәт тәшкилати чәт әлниң иқтисадий йардимигә еришиш, һәр қандақ сәвәб билән җәмийәттә қалаймиқанчилиқ оттуриға чиққан һаман сийасий өзгириш қозғаш һәрикитини башлашни пиланлиған.»

 байанатта қәйт қилинишичә, сийасий өзгириш қозғашни пиланлиған бу «сийасий сүйиқәстчиләр» кәң даирилик тәкшүрүлмәктә икән.