түркмәнистан пирезиденти әрдоғанниң туғулған күнини тәбриклиди

түркийә авази радийоси хәвири: «‹түркмәнистан› гезити» ниң хәвиригә қариғанда, түркмәнистан пирезиденти сәрдар бәрдимуһәмәдов  түркийә җумһурийити җумһур рәиси рәҗәп таййип әрдоғанға телеграмма йоллап, әрдоғанниң туғулған күнини тәбриклигән, һәмдә  униңға есәнлик, бәхт – саадәт вә узун өмүр тилигән.

бәрдимуһәмәдов телеграммисиида, җумһур рәис әрдоғанниң түркийә – түркмәнистан мунасивәтлириниң тәрәққий қилишиға наһайити зор төһпиләрни қошқанлиқини тәкитләп мундақ дегән: «икки дөләт оттурисидики достанә һәм қериндашлиқ мунасивәтлиримизгә наһайити зор әһмийәт берип келиватимиз, буниң кәлгүсидә икки дөләт хәлқлириниң түп мәнпәәтлирини қоғдайдиған мунасивәтлириниң техиму қудрәт тепишида муһим рол ойнайдиғанлиқиға ишинимиз.»

түркмәнистан хәлқ мәслиһәт кеңишиниң рәиси гурбангули бәрдимуһәмәдовму җумһур рәис рәҗәп таййип әрдоғанниң туғулған күнини тәбрикләп телеграмма йоллиди.

у телеграммисида, түркмәнистан – түркийә оттурисидики һәмкарлиқ мунасивәтлириниң тәрәққий қилишиға зор төһпиләрни қошқанлиқи үчүн җумһур рәис рәҗәп таййип әрдоғанға миннәтдарлиқ билдүрди.

1954 – йили 26 – феврал күни дунйаға кәлгән җумһур рәис рәҗәп таййип әрдоғанниң туғулған күни түнүгүн аммиви ортақлишиш тор бәтлиридики сәһипилиридиму миңларчә учурлар арқилиқ тәбрикләнгәниди.

русийә пирезиденти владимир путин, өзбекистан пирезиденти шәвкәт мирзийайев вә сербийә пирезиденти александар вуҗич қатарлиқ рәһбәрләрму телефон қилип, җумһур рәис рәҗәп таййип әрдоғанниң туғулған күнини тәбриклигәниди.