toqayéw qesem bérip wezipe öteshni bashlidi

türkiye awazi radiyosi xewiri: qazaqistanda 20 – noyabirda ötküzülgen pirézidéntliq saylimida ghelibe qazanghan qasim jömert toqayéw üchün paytext astanediki musteqilliq sariyida qesem bérish murasimi ötküzüldi؛ murasimgha bash ministir, parlamént ezaliri, ministirlar we nurghun tekliplik méhmanlar qatnashti.

toqayéw «xelqige sadiqliq bilen xizmet qilidighanliqi, qazaqistanning asasiy qanuni we qanunlirigha qattiq emel qilidighanliqi, puqralarning hoquqi we erkinlikige kapaletlik qilidighanliqi we özige yüklengen éghir mejburiyetni estayidilliq bilen ada qilidighanliqi» toghrisida qesem bérip wezipe öteshni bashlidi.

u, qazaqistanning dölet menpeetini qoghdashni asas qilghan tengpung we ijabiy tashqi siyaset yürgüzüshni dawamlashturidighanliqini tilgha élip: «qoshna döletler rusiye, xitay we ottura asiya döletliri bilen özara menpeet yetküzidighan shekilde hemkarliq we istratégiyelik shérikchilik munasiwiti qurush qatarliqlar muhim ishimiz bolidu» dédi.

pirézidént toqayéw yene, amérika qoshma ishtatliri, yawropa ittipaqi, asiya we ottura sherq döletliri hemde qiziqidighan barliq döletler bilen köp tereplimilik hemkarliqni dawamliq kücheytidighanliqini tekitlidi.