lachin shehiri we yéziliri ezerbeyjanning kontrolluqigha ötti

türkiye awazi radiyosi xewiri:ezerbeyjan pirézidénti ilham eliyéw twittérda: «biz ezerbeyjanliqlar bügün 26-awghustta (2022) lachin shehirige qaytip kelduq. ezerbeyjan armiyesi lachin shehirige orunlashti. zabuh we sus yéziliri kontrolluq astigha élindi. bu wesile bilen, barliq lachinliqlarni we ezerbeyjan xelqini tebrikleymen. yashisun lachin! yashisun ezerbeyjan!» dep uchur hembehirlidi.

ezerbeyjan, erméniye we rusiye 2020-yili 10-noyabir 2-qarabagh urushidin kéyin imzalighan üch terep xitabnamesi boyiche, lachin shehirining kontrolluqi waqitliq rusiye armiyesige bérilgen idi. bügün lachin shehiri, zabuh we sus yéziliri orun alghan «lachin karidori» dep bilinidighan linyedin hem rusiye armiye qisimliri, hemde ermenler chiqip ketti. shundaq qilip, mezkur rayon baku hökümitining qoligha ötken boldi.

2020-yili 10-noyabir imzalanghan üch terep xitabnamesige asaslanghanda, ezerbeyjan üch yil ichide qarabaghdiki ermen nopusining erméniyege bérish-kélishliride paydilinidighan we lachin shehirining sirtidin ötidighan yéngi yol yasaytti. ezerbeyjan 32 kilométirliq bu yolni pilan qilinghandin burun pütküzdi.

ezerbeyjanning qarabagh rayonida yashaydighan ermenler, erméniyege bérish-kélishlirini yéngi yol arqiliq emelge ashuridu. yéngi yolning bixeterlikini rusiye armiye qisimliri qoghdaydu. lachin we yéziliri 1992-yili erméniye armiyesi teripidin ishghal qilinghan bolup, kéyinki yillarda bu yerlerge süriye we liwandin élip kélingen ermenler olturaqlashturulghan idi.

ezerbeyjan bolsa, buning urush jinayiti we jenwe kélishimige xilap ikenlikini élan qilghan idi.