түркийә-өзбекстан-әзәрбәйҗан үч тәрәп йиғини өткүзүлди

түркийә авази радийоси хәвири: түркийә-өзбекстан-әзәрбәйҗан ташқи ишлар министирлири, сода вә қатнаш министирлири йиғиниға, түркийә ташқи ишлар министири мәвлүт чавушоғлу, сода министири мәһмәт муш, қатнаш министири адил караисмаилоғлу, әзәрбәйҗандин ташқи ишлар министири җәйһун байрамов, диҗитал тәрәққийат вә қатнаш министири рәшат нәбийев, иқтисад министири микаил җаббаров, өзбекстандин ташқи ишлар министир вәкили владимир наров, қатнаш министири илһам махамов, ташқи сода вә муавин мәбләғ селиш министири лазиз қудрәтов қатнашти.

өзбекстан ташқи ишлар министир вәкили владимир наров сөз қилип, йиғинниң әзәрбәйҗанниң тәклипи вә түркийәниң қоллиши билән өткүзүлгәнликини билдүрди.

у: «хәлқара мунасивәтләр вә дунйа иқтисадидики тез тәрәққийатлар әслидә түркийә-өзбекстан-әзәрбәйҗан дийалог форматини тәрәққий қилдурушни вә буни балдуррақ әмәлгә ашурушни мәҗбур қилди. дөләт башлиқлириниң йеқинқи йиллардики сийасий ирадилири вә түзгән һәрикәт пилани сайисида, өзбекстанниң әзәрбәйҗан һәмдә түркийә билән болған мунасивәтлири йеңи дәвргә кирди, мунасивәтләр бу дәврдә истратегийәлик чоңқурлуққа игә болди» деди.

у мәзкур дөләтләрниң нурғун хәлқаралиқ мәсилиләрдә ортақ мәйданини намайан қилғанлиқини, охшаш мәқсәт үчүн тиришчанлиқ көрсәткәнликини билдүрүп: «бу болсиму, тинчлиқпәрвәр, давамлаштурғили болидиған вә динамик болған түрк дунйасини шәкилләндүрүштур» деди.

у түркийә, өзбекстан вә әзәрбәйҗанниң районлар ара һәмкарлиқида муһим актийор болалайдиғанлиқини әскәртип, түрк хәлқлири йашайдиған бу районларниң шәрқ билән ғәрб, шимал вә җәнуб арисида миң йиллардин бери көврүклүк рол ойнап кәлгәнликини, бу сәвәбтин, районлар ара қатнаш каридорлирини тәрәққий қилдуруш нуқтиси җәһәттин ейтқанда, бу дөләтләрниң арзусиниң интайин муһим икәнликини қәйт қилди.

у өзбекстанниң баку-тиблис-карс төмүр йолиниң йошурун күчидин актип пайдилинишқа әһмийәт бәргәнликини алаһидә тәкитлиди.

у хитай-қирғизистан-өзбекстан төмүр йоли лайиһәсиниң қурулуши үчүн тәкшүрүш хизмәтлириниң давамлишиватқанлиқини, бу йолниң транс кавказ каридориға туташтурулуши билән хитайдин йавропағичә болған җуғрапийәдә төмүр йол ториниң шәкиллинидиғанлиқини, өзбекстанниң бу нуқтидин зәнгүзар каридорини қайта ишқа кириштүрүшни қоллиғанлиқини билдүрди.

йиғинда, түркийә-өзбекстан-әзәрбҗан ташқи ишлар министирлири, сода вә қатнаш министирлириниң һазардин өтидиған «шәрқ-ғәрб оттура каридори» қатарлиқ үч дөләт ортақ көңүл бөлидиған мәсилиләрдә өзара һәмкарлиқларни күчәйтиш темилирини музакирә қилидиғанлиқи пәрәз қилинмақта.

министирлар йиғинни ахирлаштурғандин кейин, ташкәнт хитабнамәсини имзалайду.