türkiye-ezerbeyjan-qazaqistan tashqi ishlar ministirliri we qatnash ministirliri yighini échildi

türkiye awazi radiyosi xewiri:türkiye tashqi ishlar ministiri mewlüt chawushoghlu ukraina-rusiye urushi sewebidin ashliq bésilghan paraxotlarning portlardin chiqishigha ruxset qilinishi üstide toxtilip: «sijilliqqa ige we bixeter qatnash linyelirining qanchilik muhim ikenlikini bu kirizista yene bir qétim körduq» dédi.

türkiye tashqi ishlar ministiri mewlüt chawushoghlu, ezerbeyjan tashqi ishlar ministiri jeyhun bayramow we qazaqistan tashqi ishlar ministiri muxtar tilewberdi bilen paytext bakuda échilghan türkiye-ezerbeyjan-qazaqistan tashqi ishlar ministirliri hemde qatnash ministirliri yighinidin kéyin, ortaq axbarat élan qilish yighinida söz qildi.

u üch terep yighinning tunji qétim ötküzülgenlikini, uchrishishta qatnash témiliridin bashqa, rayon mesililiriningmu muzakire qilinghanliqini bildürdi.

u ukraina-rusiye urushi sewebidin otturigha chiqqan ashliq sodisi mesililiri üstide toxtilip: «b d t bilen mesililerni hel qilish üchün zor tirishchanliq körsitiwatimiz. sijilliqqa ige we bixeter qatnash linyelirining qanchilik muhim ikenlikini yene bir qétim körduq. bu sewebtin dölet ichidiki we rayondiki iqtidarimizni ashurush üchün muhim mebleghlerni salduq we séliwatimiz. baku-tiblis-kars tömür yoli, baku-tiblis-jeyhan turuba linyesi we tanapqa oxshash pilan-layiheler rayonimizning chéhrisini özgertti» dédi.

u türkiyening ezerbeyjan-erméniye otturisidiki musapini qollighanliqini eskertip: «ezerbeyjanning gherbiy rayonliri bilen nehchiwanni tutashturidighan zengezur karidorini qollaymiz, karidorning baldurraq qatnashqa échilishini kütimiz» dédi.

bu qétimqi türkiye-ezerbeyjan-qazaqistan tashqi ishlar ministirliri we qatnash ministirlirining tunji yighinida, hazar déngizi bilen sherq-gherb ottura karidorining yoshurun küchini tereqqiy qildurush mesilisi muzakire qilindi.

mewlüt chawushoghlu, jeyhun bayramow we muxtar tilewberdi üch dölet heyitining yighinidin kéyin, baku xitabnamesini imzalidi.