türkiye bilen özbékstan yéza igilikide hemkarliq ornitidu

türkiye awazi radiyosi xewiri: türkiye yéza igiliki we orman ministiri bekir pakdemirli özbékstan ziyaritining uzun waqittin buyan pilanlanghan we hazirdin bashlapla netijiliri körülüshke bashlighan nahayiti ünümlük ziyaretlerning biri ikenlikini bildürdi.

körüshüshte, türkiyening tashkentte turushluq bash elchisi olgan bekar hemrah boldi.

pakdemirli sözide, türkiyening zémin chongluqi jehette dunyada 30-orunda turidighan bolsimu, yéza igilikide dunyada aldinqi 10 döletning ichige kirishke yüzlengen dölet ikenlikini eskertip, muhim dep qaraydighan mezkur sahediki muweppeqiyetlirini dost we qérindash dölet özbékstan bilen ortaqlishishni xalaydighanliqlirini qeyt qildi.

u yéza igiliki saheside ikki döletning hemkarliqini tereqqiy qildurush üchün xizmet pilani we özara uchur almashturush toghrisida heriket pilani tüzgenliklirini bildürüp, zémin menbelirining ünümini ashurushta, ortaq tirishchanliq körsitish heqqide pikir birliki hasil qilghanliqlirini eskertti.

u bilim we téxnologiye sahesige yardem qilish üchün türkiye yéza igiliki tetqiqati bash idarisining özbékstanda bir ishxana achidighanliqini bildürdi.

u yene, qurghaqchiliqqa berdashliq béreleydighan mehsulatlarni yétishtürüsh we déhqanlarni qollaydighan sistémini özbékstanda ijra qilishta, özbékstangha tejribilirini yetküzüshni xalaydighanliqlirini tekitlidi.

u özbékstanda birinchi qedemde, ormanchiliq saheside köchetzarliq we telim-terbiye merkizi qurushni xalaydighanliqlirini bildürüp, türkiyening yéza igiliki sughurush sistémiliri we su ambiri qurulushi saheliridiki tejribilirini özbékstan bilen ortaqlishishnimu xalaydighanliqlirini qeyt qildi.

özbékstan yéza igiliki ministiri xojayéw türkiye bilen yéza igiliki saheside üch témida hemkarliq ornitishni we tejribilerdin paydilinishni xalaydighanliqlirini bildürdi.

körüshüshtin kéyin, türkiye bilen özbékstan otturisida yéza igiliki saheside  istratégiyelik hemkarliq üchün heriket pilani, türkiye yéza igiliki we orman ministirliqi bilen özbékstan yéza igiliki ministirliqi otturisida yéza igiliki tetqiqati saheside hemkarliq ornitish xitabnamesi we türkiye-özbékstan yéza igiliki ijraiye komitétining 3-nöwetlik yighin xatirisi imzalandi.