shimaliy qibris: «bir aral, ikki dölet» siyasitini yolgha qoyush basquchigha qedem qoyduq

türkiye awazi radiyosi xewiri: shimaliy qibris türk jumhuriyiti tashqi ishlar ministiri tahsin ertughruloghlu, shimaliy qibris türk jumhuriyiti bolush süpiti bilen, igilik hoquq barawerliki we teng hoquqluq xelqaraliq salahiyet dairiside aralda ikki ayrim döletning mewjutluqini asas qilidighan siyasetni yolgha qoyuwatqanliqlirini éytti.

ministir ertughruloghlu, qibris mesiliside axbarat wasitilirigha bergen bayanatida, diplomatiye siyasetlirining asasiy pirinsiplirining, teng hoquqluq xelqaraliq salahiyetning mewjutluqi ikenlikini tekitlep mundaq dédi: «qibris arilida ikki dölet bardur, shunga, <bir aral, ikki dölet> heqiqitining otturigha chiqishi kérek.»

 birleshken döletler teshkilati bash katipi antonyo gutéréshning chaqiriqigha asasen, 27 – 29 – aprél künliri shiwéytsariyening jenwe shehiride gheyriy resmiy 5 tereplik birleshken döletler teshkilati (qibrisliq tereplerdin sirt yene, türkiye, girétsiye we engliye) qibris konféransi ötküzülgenlikini eskertken ertughruloghlu,  birleshken döletler teshkilati bash katipi antonyo gutéréshning, ortaq zémin hazirlanmighanliqi seweblik, 2 – 3 ay kéyin yéngi bir yighin ötküzüsh toghruluq chaqiriqta bolidighanliqini bildürüp, konféransni taqighanliqini éytti, hemde  birleshken döletler teshkilati bash katipi antonyo gutéréshning, aprél éyida jenwede «2 – 3 ay kéyin yighin ötküzüsh toghruluq chaqiriqta bolidighanliqi» ni éytqan bolushigha qarimay, téxiche tereplerge bu heqte chaqiriqta bolmighanliqini tekitlep mundaq dédi: «birleshken döletler teshkilati bash katipi antonyo gutéréshmu, qibristiki terepler otturisida ortaq zémin hazirlanmighanliqini obdan bilidu, emma bu heqte chaqiriq élan qilmay, waqitni kéchiktürüwatidu.»

birleshken döletler teshkilatini öz ichige alghan pütkül dunyaning, qibris mesilisining réalliqigha mas halda siyaset yürgüzgen haman «bir aral, ikki dölet» siyasitining küntertipke kélidighanliqini éytqan ertughruloghlu, bu heqiqet qobul qilinghandin kéyin, shimaliy qibris türk jumhuriyitining étirap qilinishi yolida aktip siyasetni yolgha qoyush basquchigha qedem qoyidighanliqlirini bildürdi.