әрменийә уруш тохтитишқа хилаплиқ қилмақта

түркийә авази радийоси хәвири: әзәрбәйҗан дөләт мудапиә министирлиқиниң байанатида, әзәрбәйҗанниң росийә тәрәптин шу йәрниң вақти саәт 10:00 да елан қилинған уруш тохтитиш чақириқини қобул қилғанлиқи билдүрүлди.

байанатта мәзкур чақириққа қаримай, әрменийәниң әзәрбәйҗан базилириға қаратқан һуҗумлирини давамлаштуриватқанлиқи тәкитлинип, «әрменийә тәрәп қошумчә танка вә 120 миллиметирлиқ минамйот ишлитип вәзийәтни техиму йаманлаштурушни вә базилиримизға қаритип оқ чиқиришни давамлаштурмақта» дейилди.

әзәрбәйҗан дөләт мудапиә министирлиқиниң йәнә бир байанатида, әзәрбәйҗан армийәсиниң әрменийә қораллиқ күчлири тәрипидин бүгүн кәчтә кәлбәҗәр тәрәпкә қаратқан иғвагәрчилик урунушлириға қарши тәдбирләрни йолға қойушни давамлаштуриватқанлиқи әскәртилди.

әрменийәниң һуҗум характерлик қәдәмлиригә қарши зөрүр болған қәдәмләрниң ташланғанлиқи тәкитләнгән байанатта йәнә, «әрменийәниң һәрбий вә сийасий рәһбәрлик қатлимини икки дөләтниң дөләт чегрисидики вәзийәтни қутратқулуқлардин вә қәстән йаманлаштуруштин узақ турушқа шундақла дөләт чегралириниң мәдәний шәкилдә бәлгилинишигә алақидар музакириләрни башлашқа чақиримиз» дегән сөзләр ишлитилди.

байанатта, әрменийәдики пуқралар олтурақ райониға зийан йәткүзүлгәнлики тоғрисидики хәвәрләрниңму асассиз вә пүтүнләй қаймуқтуруш характеригә игә икәнлики тәкитләнди һәмдә чегра бойидики җиддийликниң күчийишидики барлиқ мәсулийәтниң әрменийәдә икәнлики уқтурулди.

әзәрбәйҗан дөләт мудапиә министирлиқи бүгүн әтигән елан қилған байанатида, әрменийә әскәрлириниң икки дөләт чеграсиниң кәлбәҗәр йөнилишидики әзәрбәйҗан базилириға қаритип оқ етиши сәвәбидин 2 әскәрниң йариланғанлиқини елан қилған иди.

әрменийә дөләт мудапиә министирлиқи болса, тоқунушта 3 нәпәр әрменийә әскириниң қаза қилғанлиқини  вә 2 әскәрниң йариланғанлиқини илгири сүргән иди.