qirghizistan pirézidénti sadir japparowning türkiye ziyariti
yawroasiyagha nezer - 77
qirghizistan pirézidéntining türkiye ziyariti
abdresul ishaqow
2021-yili, 6-ayning 9-künidin 11-künigiche, qirghizistan pirézidénti sadir japparow tunji qétim türkiyede ziyarette boldi. pirézidént japparow, 9-iyun enqerede jumhur reis rejep tayyip erdoghan teripidin resmiy murasim arqiliq qarshi élindi. aldi bilen, ikki döletning rehberliri ayrim körüshti. andin, 5-nöwetlik türkiye-qirghizistan istiratégiyelik aliy hemkarliq kéngishi yighini ötküzüldi. uchrishishlardin kéyin, yéza igilik, sehiye, medeniyet we tenterbiye qatarliq sahelerni öz ichige alghan 7 kélishim imzalandi.
shu küni, türkiye – qirghizistan dölet bashliqliri we ularning repiqilirining ishtirak qilishida, 4-nöwetlik xelqara issiq köl munbiri yighinining yépilishi ishqa ashuruldi. chinggiz aytmatowning mirasi bolghan issiq köl munbirining tunji nöwetlik yighini ötken yili bishkekte chaqirilghanidi.
2021-yili, 6-ayning 10-küni, pirézidént japparow, türkiye büyük millet mejlisi bashliqi mustafa shentop bilen körüshti. uchrishishta, ikki tereplik we rayonluq munasiwetler muzakire qilindi.
pirézidént sadir japparow kéyinche türkiye soda - sanaetchiler we karxanichilar birlikini ziyaret qildi. türkiye soda - sanaetchiler we karxanichilar birliki iqtisad we téxnika unwérsititi, japparowgha pexriy doktorluq unwani berdi. bu yerde japparow türk soda - sanaetchilerge xitab qildi. 2021 -yili, 8-awghusttin 9-awghustqiche, issiq kölde, türk kéngishige eza döletlerning soda – iqtisad munbiri yighini ötküzülidu. pirézidént japparow türk soda – sanaetchilerni bu soda – iqtisad munbiri yighinigha teklip qildi.
shu küni, sadir japparow türkiyediki qirghizistan diasporasining wekilliri bilen körüshti. uchrishishta, türkiyede yashawatqan qirghizistanliqlarning mesililiri muzakire qilindi.
ziyaret dairiside sadir japarof, türk kéngishining bash katipi baghdad amréyéw bilen körüshti. qirghizistan pirézidéntining türkiyediki ziyariti kapadokya seylisi bilen axirlashti.
pirézidént sadir japparowning ziyariti bilen birlikte türkiye-qirghizistan munasiwetliride yéngi bir sehipe échildi. diplomatiye siyasitide rusiye bilen xitayni imkaniyetning bariche tengpunglashturush jehettin, qirghizistanning qérindash türkiye bilen téximu qoyuq hemkarlishishigha toghra kélidu.
yéqinda tajikistan bilen bolghan chégra mesilisidin körüwélishqa boliduki, mudapie sahesidimu qirghizistan türkiye bilen yéngi kélishimlerni imzalash we yéngi mudapie sanaiti mehsulatlirini sétiwélishqa éhtiyajliqtur. axbarat wasitilirida bu mesilining enqerede muzakire qilinghanliqi toghruluq xewerler élan qilindi.
qirghizistan soda – sanaetchiler birleshmisining türkiye soda-sanaetchiler we karxanichilar birlikige oxshash aktip bir organgha aylandurulushi toghrisida dairiler otturisida birdeklik hasil qilindi. ziyaret dairiside, qirghizistanning chüy rayonida ortaq sanaet rayoni qurush mesilisi qayta küntertipke keldi.
türkiye bishkekte saldurghan we «kowid – 19» yuqumi mezgilide intayin paydiliq bolghan qirghizistan-türkiye dostluq doxturxanisining resmiy échilishi mesilisimu ziyaret jeryanida muzakire qilindi. ikki dölet otturisida hasil qilinghan kélishimige asasen, qirghizistanda dawalinalmighan bimarlar türkiyege keltürülüwatatti. buningdin kéyin, bu bimarlarning qirghizistan-türkiye dostluq doxturxanisida dawalinishini ishqa ashurush pilanlanmaqta. qirghizistan jumhuriyiti sehiye we ijtimaiy tereqqiyat ministiri alimqadir beyshénaliyéw, ziyaret dairiside 20 qirghiz doxturning türkiyede ikki yil tejribe almashturushi mesiliside birdeklik hasil qilighanliqini uqturdi. qirghizistan-türkiye manas uniwérsitétimu kéler qétimliq oqush yilidin bashlap méditsina fakultétigha oqughuchi qobul qilishni bashlaydighanliqini bildürdi. bu özgirishlerning hemmisi qirghizistan-türkiye munasiwetlirining yenimu yüksek sewiyege yetküzülüshide türtkilik rol oynaydu, elwette.
مۇناسىۋەتلىك خەۋەرلەر
ezerbeyjan bash ministiri türkiyede ziyarette bolmaqta
ezerbeyjan bash ministiri eli esedof türkiyede dölet ishliri ziyaritide bolmaqta.
özbékistan bilen wéngiriye erkin iqtisadiy rayon quridu
özbékistanda wéngiriye we yawropa shirketliri üchün alahide erkin iqtisadiy rayon qurulidu.