қирғизистан – таҗикистан чеграсидики қораллиқ тоқунушта қаза қилғанларниң сани 49 кишигә йәтти

түркийә авази радийоси хәвири: қирғизистан сәһийә вә иҗтимаий тәрәққийат ишлири министирлиқи баткән районида, 29 – апрелда йүз бәргән қораллиқ тоқунушта қаза қилған қирғизистан пуқралири саниниң 34 кишигә вә йариланғанлар саниниң 173 кишигә йәткәнликини елан қилди.

таҗикистан таратқулири, тоқунушта қаза қилған таҗикистан пуқралири саниниң 15 кә йәткәнликини, һайатидин айрилғанлардин 7 нәпириниң әскәр икәнликини елан қилди.

таҗикистан таратқулири дәсләптә қораллиқ тоқунушта 90 ға йеқин таҗикистан пуқрасиниң йариланғанлиқини хәвәр қилған иди.

қирғизистан-таҗикистан чеграсида су тәқсимләш торини контрол қилиш мәсилисидә җиддийлик йүз бәргән вә 29-апрелда икки дөләт чегра мудапиә қисимлириниң мәсилигә арилишиши билән тоқунуш чиққан иди.

тоқунушта нурғун өй, дөләт бинаси вә хизмәт орунлири зийанға учриған иди.

икки дөләтниң дипломатийә министирлириниң музакирилишиши нәтиҗисидә, тәрәпләрниң илгирики орунлириға чекиниши, мәсилиниң музакирә арқилиқ һәл қилиниши вә уруш тохтитиш тоғрисида келишим һасил қилинған иди.