түркистанда әсирләр бойи сақлинип кәлгән хоҗа әһмәт йәсәви һөҗҗәтлири оттуриға чиқти

түркийә авази радийоси хәвири: тарихи қолйазмилар, тамғилиқ һөҗҗәтләр вә узунлуқи 3 йерим метир келидиған нәсәб шәҗәриси, 13-әсирдә йүсүп ата тәрипидин чағатай тилида йезилғанлиқи ениқланди.

хоҗа әһмәт йәсәви җәмәтиниң түркистан шәһиридики өйидә сақланған бу һөҗҗәтләр, музейға ианә қилинидиған вә һөҗҗәттә йезилғанлири нурғун тилларға тәрҗимә қилинидиған болди.

тарихи һөҗҗәтләр әвладму әвлад давамлишип, хоҗа әһмәт йәсәвиниң җийәни йүсүп атаниң нәврилири тәрипидин қоғдап келингән иди. әсирләр бойи мәхпий сақлап келингән бу һөҗҗәтләр әмди оттуриға чиқирилди.

йүсүп атаниң нәвриси сәйдалим йолдашев: «сабиқ совет иттипақи дәвридә биз бу һөҗҗәтни һечкишигә көрсәтмәйттуқ. у дәврләрдә бу хил һөҗҗәтни нә өзимиз сақлийалмайттуқ, нә башқиларға берәлмәйттуқ. бу һөҗҗәтниң ашкарилинидиған вақти йетип кәлди» деди.

бу һөҗҗәтләр хоҗа әһмәт йәсәви дәвригә аит муһим қарарлар, йәр намлири, чегра мәлуматлири вә кишиләрниң күндилик турмушиға алақидар тәпсилатларниму өз ичигә алиду.

сәйдалим йолдашев: « бу һөҗҗәтләрдә хоҗа әһмәт йәсәвиниң оқуғучилири меһман қилған чағдики дастиханға қойулған йемәкләргә даир мәлуматларму бар. хоҗа әһмәт йәсәвигә әйни чағда 12 хил үзүм сунулған икән» деди.

дәврләргә дуел елан қилған бу  қиммәтлик һөҗҗәтләр һәзрәти султан тарих вә мәдәнийәт қоғдаш музейиға тапшуруп берилидиған болди.

һәзрәт султан музейиниң директори нурболат әһмәтҗанов: «оттуриға чиққан бу тарихий һөҗҗәтләр музей мутәхәссислири тәрипидин тәкшүрүлиду. илгири көрүлмигән йеңи мәлуматлар оттуриға чиқиши мумкин. биз һөҗҗәтләрни қазақчә тәрҗимә қилип, китаб қилип нәшр қилишни ойлишиватимиз» деди.

нурболат әһмәтҗанов хоҗа әһмәт йәсәви тоғрисидики тәтқиқатларниң дөләт ичи вә сиртида давам қилидиғанлиқини тәкитлиди.