türkiye bilen qazaqistan mudapie hemkarliqini kücheytidu

türkiye awazi radiyosi xewiri: qazaqistan dölet mudapie ministirliqi bayanat élan qilip, mudapie sahesidiki hemkarliqni kücheytishning muzakire qilinghanliqini bildürdi.

bayanatqa asaslanghanda, türkiye muawin dölet mudapie ministiri muhsin dere ikki künlük qazaqistan ziyariti jeryanida qazaqistan dölet mudapie ministiri nurlan yermekbayéw bilen körüshken.

körüshüshte, ikki dölet otturisidiki mudapie sanaiti sahesidiki shériklikler we herbiy telim-terbiye saheside hemkarliq ornitish mesililiri muzakire qilinghan.

qazaqistan bilen türkiyening köp tereplik istratégiyelik munasiwetlirining dawamliq tereqqiy qilduruldighanliqi bildürülgen bayanatta, körüshüshte, türkiyening chong mudapie shirketliri bilen hemkarliq ornitish mesililiriningmu küntertipke kelgenliki qeyt qilindi.

ministir dere we uning hemrahliqidiki heyetning, qazaqistan sanaet we ul-eslihe tereqqiy qildurush ministiri beybit atamkulow bilenmu körüshkenliki bildürüldi.

qazaqistan terep wuxen wirusi(Kovid-19)  gha qarshi turushta qilghan yardem sewebidin türkiyege rehmet éytqan körüshüshte, ikki dölet ortaq ishlepchiqarghan optik we radiyo éléktironluq sahesidiki herbiy mehsulatlarni ishlepchiqirishta qolgha keltürgen muweppeqiyetler alahide tilgha élindi.

türkiye muawin dölet mudapie ministiri muhsin dere qazaqistanning ottura asiyada türkiye üchün muhim shérik döletlerdin biri ikenlikini eskertip: «uzun we ünümlük uchrishishlarni emelge ashurduq. ikki qérindash dölet otturisida herbiy we téxnika saheliride nurghun yéngi kélshimlerni tüzüshni pilanlawatimiz» dédi.

türkiye heyiti ziyariti jeryanida, paytextke jaylashqan töt mudapie sanaet shirkiti bilen nursultan nezerbayéw dölet mudapie uniwérstétini ziyaret qildi.