қирғизистан илгири түзүлгән келишимләргә бойсунидиғанлиқини билдүрди

түркийә авази радийоси хәвири: пирезидентлиқ мәһкимисиниң ахбарат мәркизидин елан қилинған байанатқа асасланғанда, баш министир җапаров чәт әлләрниң баш әлчиләр, хәлқаралиқ идарә-органлар, тәшкилатлар вә пәхри консулханилар билән бир йәргә җәм болди.

у сөзидә, қирғизистанниң һәр қачан чәт әллик шериклири, шундақла хәлқаралиқ вә районлуқ тәшкилатлар билән имканийәтниң беричә достанә мунасивәтләрни тәрәққий қилдурушқа әһмийәт бәргәнликини қәйт қилди.

у ташқи сийасәттә алдин әһмийәт беридиған нуқтилар тоғрисида тохтилип: «қирғизистан ташқи сийасәттә лайәқәтлик болуш пиринсипиға вә илгири түзүлгән икки тәрәплик вә көп тәрәплик келишимләр рамкисида барлиқ хәлқаралиқ мәсулийәтләргә қаттиқ бойсуниду» деди.

у қирғизистанда һакимийәтниң алмишишиға сәвәб болған 5-өктәбир вәқәлири тоғрисидиму тохталди.

у: 5-өктәбирдә йүз бәргән вәқәләр, адил болмиған сайламларниң нәтиҗиси иди. бүгүн дөлитимиздә вәзийәт муқимлашти. сийасий мусапиләр қануний асасқа қайтип кәлди» деди.

у қирғизистанниң иттипақдашлири вә истратегийәлик шериклири билән өзара һәмкарлиқлирини күчәйтиш үчүн көрситиватқан тиришчанлиқлирини давамлаштуридиғанлиқини әскәртип, алдин әһмийәт беридиған хизмәтлири арисида, иҗтимаий вә иқтисадий мәсилиләрни һәл қилиш, мәбләғ салғучиларниң ишәнчигә қайтидин еришиш вә мәмурий башқуруш түзүмлирини ислаһ қилиш қатарлиқларниң барлиқини билдүрди.

садир җапаров 2020-йили 5-өктәбир парламенттин орун алалмиған партийәләр өткүзгән намайишлар зораванлиққа айлинип кәткәндин кейин, 6-өктәбир қоллиғучилири тәрипидин түрмидин чиқирилған вә шу күни «вақитлиқ баш министир» дәп елан қилинған иди.

парламентниң ишәнч авазиға еришкән җапаров пирезидент соронбай җәенбеков хизмитидин истепа бәргәндин кейин, пирезидентниң һоқуқини өткүзүвалған иди.