илһам әлийев әзәрбәйҗанниң зәпирини тәбриклиди

түркийә авази радийоси хәвири: әзәрбәйҗан пирезиденти илһам әлийев хәлққә хитаб қилип сөзлигән нутуқида, әзәрбәйҗан, әрменийә вә русийә оттурисидики ортақ хитабнамәниң имзаланғанлиқини әскәртип, хитабнамәниң маддилирини оқуди.

у келишим бойичә, һәрбий һәрикәтләрниң тохтиғанлиқини, әзәрбәйҗан билән әрменийәниң контрол қиливатқан нуқтилирида туридиғанлиқини билдүрди.

у кәлбәҗәрниң 15-нойабирда, ағдам райониниң 20-нойабирда вә лачинниң 1-декабирда әзәрбәйҗанға қайтуруп берилидиғанлиқини уқтурди.

у мундақ деди:

«тағлиқ қарабағниң учришиш линйәси вә лачин каридорида русийә тинчлиқ күчлиридин йиник типлиқ қораллар билән қоралланған 1960 әскәр вә 90 һәрбий аптомобил орунлишиду. русийә тинчлиқ күчлири тағлиқ қарабағда бәш йил туриду. тәрәпләр наразилиқ билдүрмисә, бу муддәт узартилиду. көчмәнләр йурт-маканлириға қайтиду. әсирләр вә җәсәтләр өзара алмаштурулиду. райондики барлиқ иқтисадий вә қатнаш торлири қайтидин тәсис қилиниду. әзәрбәйҗанниң ғәрбтики вилайәтлири билән нәһчиван аптоном җумһурийити оттурисидики қатнаш каридори ечилиду.»

у түркийә җумһур рәиси рәҗәп таййип әрдоғанға, тоқунушлар җәрйанида әзәрбәйҗанни қоллиғанлиқиға тәшәккүр ейтип, мундақ деди:

«бүгүнки хитабнамәдә, русийә билән түркийәниң ортақ тинчлиқ күчи вәзиписини үстигә елиши орун алиду. район учришишлири тоғрисида пүтүнләй йеңи йол йаритимиз.»

у келишимниң әрменийәниң йиңилгәнликини билдүридиғанлиқини алаһидә әскәртип: «пашинйан келишимни өзи халап әмәс, бәлки әзәрбәйҗанниң төмүр мушти нәтиҗисидә имзалиди. бу келишим бизниң шанлиқ зәпиримиз. 2020-йили 27-сентәбиргичә 300 әтрапида туралғу райониниң азад қилиниши, әрменийә армийәсиниң белини сундурди. шуңа, пашинйан бу келишимни имзалашқа мәҗбур болди» деди.

илһам әлийев қолға кәлтүрүлгән мувәппәқийәтләр мунасивити билән, ишғалдин азад қилинған районлардики хәлқләрни вә барлиқ әзәрбәйҗан хәлқини тәбриклиди.

у барлиқ шеһитлар вә хоҗали қурбанлири интиқаминиң һәссиләп елинғанлиқини тәкитләп: «пүткүл дунйа әзәрбәйҗан хәлқиниң йиңилмәс вә төмүр ирадигә игә хәлқ икәнликини көрди» деди.