акар: өзбекстан билән муһим илгириләшләрни қолға кәлтүрдуқ

түркийә авази радийоси хәвири: түркийә дөләт мудапиә министири һулуси акар пакистан вә қазақистан зийаритини ахирлаштуруп, бүгүн (2020-йили 27-өктәбир) рәсмий зийарәт үчүн өзбекстан пайтәхти ташкәнткә йетип кәлди.

һулуси акар өзбекстан дөләт мудапиә министирлиқида министир баһадир қурбанов тәрипидин мурасим билән күтүвелинди. мурасимдин кейин, һәйәтләр ара учришиш өткүзүлди. һулуси акар бу йәрдә сөз қилип, икки дөләт оттурисидики мунасивәтләргә зор әһмийәт бәргәнликлирини билдүрди. у мундақ деди:

«һәр саһә бойичә мунасивәтлиримизни тәрәққий қилдуруш үчүн ғәйрәт қиливатимиз. буниң ичидә, сода, иқтисад, иҗтимаий, сийасий мунасивәтләр билән, әлбәттә һәрбий мунасивәтму бар. бу мунасивәтләрдә муһим илгириләшләрни қолға кәлтүрдуқ.»

өзбекстан дөләт мудапиә министири баһадир қурбанов түркийә билән өзбекстанни, тили вә диний охшаш қериндаш икки дөләт дәп тәрипләп мундақ деди:

«дөләтлиримиз оттурисида тез тәрәққий қиливатқан мунасивәтләргә тайанған һалда һәрбий мунасивәтлиримизму тез тәрәққий қиливатиду.»

һәйәтләр ара учришиштики өзара сөһбәтләрдин кейин, ахбаратқа йепиқ шәкилдә давамлашқан учришишта, акар билән қурбанов һәрбий малийә һәмкарлиқ келишими вә нәқ пул йардими келишими имзаланди.

һулуси акар өзбекстан дөләт мудапиә минстири баһадир қурбанов билән болған учришишидин кейин, өзбекстан хәвпсизлик кеңишиниң баш катипи виктор мәһмудов билән көрүшти.

у көрүшүштә, һәрбий тәлим-тәрбийә вә мудапиә санаити саһәсидики мәвҗут мунасивәтләрни техиму күчәйткән һалда давамлаштурушниң зөрүр икәнликини тәкитлиди.