ezerbeyjan musteqilliqini tebriklimekte

türkiye awazi radiyosi xewiri: 1918 – yili 28 – may küni mehmet émin resulzade rehberlikidiki milliy shura teripidin musteqilliq élan qilinghan, aridin ikki yil ötkendin kéyin sabiq sowét ittipaqi teripidin ishghal qilinghan ezerbeyjan, 1991 – yili 18 – öktebir küni qaytidin musteqil dölet süpitide tarix sehnisige sekrep chiqti.

ezerbeyjan xelqi uda 70 yil sabiq sowét ittipaqi hakimiyiti astida yashighan bolsimu, lékin bir chaghlarda sherqning tunji démokratik jumhuriyiti süpitide qobul qilinghan ezerbeyjanning  irq, din, mezhep we jinsiyet ayrimastin barliq puqralirigha barawerlik hoquqi bergen bir dölet ikenlikini héchqachan untup qalmidi.

sabiq sowét ittipaqi armiyesi 1990 – yili 20 – yanwar küni baku we bashqa wilayetlerde ayal – bala démestin yürgüzgen qetliam, ezerbeyjan xelqining sabiq sowét ittipaqi hökümitige bolghan ishenchini yoqatti, shuning bilen, döletning musteqil bolush basquchi tézleshti.

öz waqtidiki parlamént ornitidiki ezerbeyjan aliy kéngishi 1991 – yili 30 – awghust küni musteqilliq élan qilinishigha alaqidar  bayannamini maqullidi. 1991 – yili séntebirde sabiq sowét ittipaqidin ayrilip, musteqilliq élan qilinishi toghruluq yighinlar chaqirildi. aliy kéngesh 1991 – yili 18 – öktebir küni «ezerbeyjan jumhuriyiti dölet musteqilliqi heqqide asasiy qanun ehdinamisi» ni köp sanliqning awazi bilen maqullidi.

bu bayanname arqiliq sabiq sowét ittipaqi ishghalchi dep qaraldi we ezerbeyjanning 1918 – yili qurulghan jumhuriyetning warisi ikenliki jakarlandi.

aliy kéngeshning qarari toghruluq 1991 – yili 29 – dékabir küni référandum ötküzüldi. référandumda xelqning hemmisi dégüdek musteqilliqni qollap awaz berdi.

ezerbeyjanda 1992 – yildin buyan her yili 18 – öktebir küni «milliy bayram» süpitide tebriklinip kelmekte.