xitay hökümiti yüz yögeshni we saqal qoyushni cheklesh belgilimisini qismen ijra qilishqa bashlidi

türkiye awazi radiyosi xewiri: xitay hökümitining uyghur élida «esebiylikni cheklesh» boyiche chiqarghan 50 maddiliq nizamnamisining 1 – apréldin étibaren ijra qilinishqa bashlinidighanliqi uqturulghan bolsimu, belgilimede körsitilgen waqit kelmey turupla ammiwi qatnash wasitilirigha oxshash bezi sahelerde ijra qilinishqa bashlidi. yüzini yögigen ayallarning qetiy yosunda aptobus yaki poyizlargha chiqirilmaydighanliqi qeyt qilindi.

nizamnamide körsitilishiche, ayrodurum we tömür yol ishchi-xizmetchiliri ayallarni yüzini yögeshtin, erlerni namuwapiq saqal qoyushtin waz kechtürüshke mesul bolidiken.

xitay hökümitining bu mesilige alaqidar höjjitide, « ata-anilar perzentlirige yaxshi peziliti arqiliq tesir körsitish, perzentlirige ilim-penge, medeniylikke intilish, milletler ittipaqliqini qoghdash, esebiylikni tosush we uninggha qarshi turush heqqide terbiye bérishi kérek» dégen ibariler orun aldi.

uyghur aptonom rayonluq 12-nöwetlik xelq qurultiyi daimiy komitétining 2017-yil 3-ayning 29-künidiki 28- nöwetlik yighinida maqullanghan 7 bab 50 maddidin terkib tapqan «aptonom rayonining esebiylikni tügitish nizami» ning toluq tékisti.

1-bab  omumiy pirinsip

1-madda  bu nizam esebiylikni tosush we yoqitish, esebiylikning ziyinining aldini élish, ijtimaiy muqimliq we ebediy eminlikni ishqa ashurush meqsitide, «jungxua xelq jumhuriyitining asasiy qanuni», «jungxua xelq jumhuriyitining térrorizmgha qarshi turush qanuni», gowuyüenning «din ishliri nizami» qatarliq alaqidar qanun-nizamlargha asasen, aptonom rayonimizning emeliyitige birleshtürüp chiqirildi.

2-madda aptonom rayonimizning memuriy teweside esebiylikni tügitishte mushu nizam tetbiqlinidu.

3-madda bu nizamda éytilghan esebiylik esebizmning tesirige uchrash, chékidin ashqan diniy idiye-qarashni terghib qilish, normal ishlepchiqirish, turmushqa tosqunluq qilish we uninggha arilishiwélishtek söz we heriketlerni körsitidu.

bu nizamda éytilghan esebizm diniy eqidilerni burmilash yaki bashqa usullar bilen öchmenlik qilish, kemsitishke qutritish, zorawanliqni terghib qilish qatarliq teshebbus we qilmishlarni körsitidu.

aptonom rayon esebiylikning aldini alidu, uni tosidu we tügitidu, esebizm jinayi heriketlirining aldini alidu we uni jazalaydu.

4-madda esebiylikni tügitishte partiyening din xizmiti asasiy fangjénida ching turush, dinni junggochilashturush, qanun idare qilish yönilishide ching turush, dinni sotsiyalizm jemiyitige uyghunlishishqa paal yéteklesh kérek.

5-madda esebiylikni tügitish xizmitide rehberlik mesul bolush tüzümi we yilliq nishan mesuliyitini bahalash tüzümi yolgha qoyulidu.

6-madda aptonom rayon, oblast (sheher, wilayet), nahiye (sheher, rayon) larda esebiylikni tügitish rehberlik guruppisi qurulup, ashu memuriy rayonda esebiylikni tügitishke mesul bolidu.

esebiylikni tügitish rehberlik guruppisi qarmiqida ishxana qurulup, tekshürüp tetqiq qilish, yétekchilik qilip maslashturush, heydekchilik qilip tekshürüsh funksiyelirini ada qilidu.

7-madda herqandaq orun we shexs angliq halda esebiylikni tosushi we uninggha qarshi turushi, esebiy söz-heriketlerni pash qilishi kérek.

8-madda esebiylikni tügitishte körünerlik netije yaratqan orun we shexsler teqdirlinidu, mukapatlinidu.

2-bab  esebiylikning asasliq ipadiliri

9-madda  esebizmning tesiridin peyda bolghan töwendiki söz-heriketler esebiylikke kiridu, u meni qilinidu:

(1) esebiylik idiyesini terghib qilish, tarqitish؛

(2) bashqilarning diniy étiqad erkinlikige arilishiwélish, bashqilarni diniy paaliyetke qatnishishqa mejburlash, bashqilarni diniy sorungha, diniy xadimlargha pul-mal bérishke yaki emgek qilip bérishke mejburlash؛

(3) bashqilarning toy-tökün, ölüm-yétim, miras warisliqi ishlirigha arilishiwélish؛

(4) bashqilarning bashqa millet yaki bashqa étiqadtiki kishiler bilen alaqilishishi, almashturushi, arilishishi, bille yashishigha arilishiwélish, bashqa milletlerni yaki bashqa étiqadtiki kishilerni turushluq jayidin heydesh؛

(5) medeniyet, köngül échish paaliyetlirige dexli yetküzüsh, radiyo-téléwiziye qatarliq jamaet mehsulatliri we mulazimitini chetke qéqish, ret qilish؛

(6) musulmanche dégen uqumni musulmanche yémeklik sahesidin bashqa sahelerge kéngeytiwétish, musulmanche emes dégen nam bilen bashqilarning zamangha layiq turmushigha tosqunluq qilish we arilishiwélish؛

(7) niqabliq kiyim-kécheklerni kiyiwélish, esebiylik belgilirini taqiwélish yaki bashqilarni shundaq qilishqa zorlash؛

(8) binormal saqal-burut qoyush, isim qoyush arqiliq diniy telwilikni terghib qilish؛

(9) qanun resmiyiti ötimey turup, diniy usulda toy qilish yaki ajrishish؛

(10) perzentlirining xelq maaripida terbiyelinishige yol qoymay, döletning maarip tüzümini yolgha qoyushqa tosqunluq qilish؛

(11) bashqilarni qorqutup we azdurup, döletning siyasetliridin behrimen bolushigha tosqunluq qilish, kimlik, nopus deptiri qatarliq dölet qanunida belgilengen guwahnamilerni shuningdek xelq pulini qesten nabut qiliwétish؛

(12) jamaetning we shexsning pul-mélini qesten nabut qiliwétish we uninggha buzghunchiliq qilish؛

(13) esebiylik mezmuni bar maqale, neshr buyumi, ün-sin buyumini neshr qilish, bésish, tarqitish, sétish, ishlesh, chüshürüsh, saqlash, köpeytish, körüsh, köchürüsh we ilkide tutush؛

(14) pilanliq tughut siyasitining yolgha qoyulushigha qesten arilishiwélish we buzghunchiliq qilish؛

(15) bashqa esebiy söz-heriketler.

3-bab  esebiylikning aldini élish, uni tosush we tügitish

10-madda  esebiylikni tügitishte milliy örp-adet, normal diniy paaliyet we qanunsiz diniy heriket bilen esebiylik qilmishining chek-chégrasini toghra igilep, xaraktérini perqlendürüp, türge ayrip tedbir qollinip, köp sandikilerni ittipaqlashturush, terbiyelesh, intayin az sandikilerni yétim qaldurush, ulargha zerbe bérishte ching turush kérek.

11-madda  esebiylikni tügitishte sistémiliq tüzesh, uniwérsal tedbir qollinish, hadisidinmu, mahiyettinmu tüzeshte ching turup, uni xelq turmushini yaxshilash, namratliqtin qutuldurup béyitish, milletler ittipaqliqi-tereqqiyati boyiche berpa qilish qatarliqlar bilen zich  birleshtürüp, özara türtke bolushni ishqa ashurush kérek.

12-madda  esebiylikni tügitishte, toghra siyasiy yönilish we jamaet pikri yétekchilikide ching turush, asasiy mélodiyeni yangritish, aktip küchni zoraytish kérek؛ idéologiye sahesidiki singdürmichilikke, bölgünchilikke qarshi turush kürishini kücheytip, her xil taratqu wasitiliridin paydilinip esebiylikni terghib qilish, jemiyet tertipini buzushni meni qilish kérek. herqandaq apparat we shexsning téma tetqiqati, jemiyet tekshürüsh, ilmiy muhakime munbiri qatarliqlarni bahane qilip, esebiylikni tarqitishi, terghib qilishi meni qilinidu.

13-madda  esebiylikni tügitishte keng dairide léksiye sözlep, keng dairide öginip we keng dairide muzakire qilip, ammigha zamaniwi pen-medeniyet bilimliridin paydilinip ilim-penge, medeniylikke intilish heqqide terbiye bérish, qanun bilimliridin paydilinip qanunni öginish, qanungha emel qilish heqqide terbiye bérish, toghra diniy étiqad arqiliq menbeni aydinglashturush, sepsetilerge reddiye bérish arqiliq dingha étiqad qilidighanlarni toghra étiqad turghuzup we toghra yol tutup, esebiylikni angliq tosushqa yéteklesh kérek.

14-madda  esebiylikni tügitishte terbiyelep özgertish xizmitini yaxshi ishlep, ayrim terbiyelesh bilen yighip terbiyeleshni, qanun idare qilish terbiyesi bérish bilen yardem we terbiye bérish paaliyitini, idiyewi terbiye bérish, pisxika jehettin yéteklesh, herikitini tüzesh bilen maharet jehettin yétishtürüshni, terbiyelep özgertish bilen insaniy köyünüshni birleshtürüp, terbiyelep özgertishning ünümini ashurush kérek.

15-madda  esebiylikni tügitishte köchme ahalige mulazimet qilish, bashqurushni kücheytip, mehelliler, saheler, tarmaqlar shuningdek her xil karxanilarning rolini jari qildurup, köchme ahale arisida esebiylikni tügitish xizmitini yaxshi ishlesh kérek.

4-bab  hökümet we alaqidar tarmaqlarning asasliq mesuliyiti

16-madda  her derijilik xelq hökümetliri we uning tarmaqliri, orunlar esebiylikni tügitish xizmitini mesuliyiti boyiche yaxshi ishlishi kérek.

17-madda  millet-din tarmiqi millet-din siyasiti we milletler ittipaqliqi teshwiq-terbiye paaliyitini, milletler ittipaqliqi-tereqqiyati boyiche berpa qilish paaliyitini qanat yaydurup, diniy zatlarni terbiyelesh, yétishtürüsh we bashqurush, mulazimet qilish méxanizmini mustehkemlep we mukemmelleshtürüp, diniy xadimlargha, diniy sorunlargha, diniy paaliyetke mulazimet qilish we uni bashqurushni kücheytishi, diniy neshr buyumlirini tekshürüshni kücheytishi, diniy xadimlarni teshkillep wez éytish, tepsir qilish xizmitini yaxshi ishlishi, toghra étiqad turghuzush we toghra yol tutushqa yéteklishi kérek. alaqidar tarmaqlar bilen birlikte qanunsiz diniy heriket, qanunsiz diniy teshwiq buyumi, qanunsiz diniy tor teshwiqatini qanun boyiche tizginleshke teshkillishi kérek.

18-madda  edliye memuriy tarmiqi alaqidar qanun-nizamlargha ait teshwiqat xizmitige teshkilatchiliq, yétekchilik qilip we uni maslashturup, qanun sawatlirini omumlashturush paaliyitini qanat yaydurup, her millet ammisining qanunni hörmetlesh, qanunni öginish, qanungha riaye qilish, qanunni tetbiqlash éngini yétildürüshi we östürüshi kérek. türme bashqurushni kücheytip, esebiylikning türmide tarqilishining aldini élip we uni tosup, özgertish, terbiyelesh xizmetlirini yaxshi ishlishi kérek.

19-madda  jamaet xewpsizliki orgini esebiylikke yatidighan qanungha xilap jinayi heriketlerning qanun boyiche aldini élip we uninggha zerbe bérip, alaqidar tarmaqlargha masliship, qanunsiz diniy heriket, qanunsiz diniy teshwiqat buyumliri, qanunsiz diniy tor teshwiqatini her tereplime tüzesh xizmitini yaxshi ishlishi kérek. alaqe tori we köchme saqlash wasitisi qatarliqlar din paydilinip, esebiylikke yatidighan qanungha xilap jinayi heriketler bilen, chégra sirtidiki esebiy küchlerning singdürmichilik, buzghunchiliq heriketliri bilen we chégradin qanunsiz kirip-chiqish heriketliri bilen shughullinishning aldini élip we uninggha zerbe bérip, nuqtiliq kishilerni bashqurushni kücheytishi kérek.

20-madda maarip tarmiqi esebiylikning xelq maaripigha arilishiwélishining aldini élip, oqutquchi-oqughuchilargha millet-din siyasiti terbiyesi, alaqidar qanun-nizamlar we penniy bilimler terbiyesi bérip, oqutquchi we oqughuchilarni dinni toghra tonush we uninggha toghra muamile qilishqa yéteklep, derslik we konsultatsiye matériyallirini tekshürüshni kücheytip, esebiylikning mektepke singip kirishining aldini élishi we uninggha taqabil turushi kérek.

21-madda  medeniyet tarmiqi sotsiyalistik yadroluq qimmet qarishini ewj aldurup, ilghar, ochuq, keng qorsaq, medeniy, ilmiy bolush idiyesini teshebbus qilip, medeniyet paaliyetliride yéngiliq yaritip, medeniy keypiyatni yétekchi qilishi kérek. asasiy qatlam medeniyet esliheliri qurulushini kücheytip, medeniyet mehsulatlirini köpeytip, jamaet medeniyiti mulazimitining ünümini östürüshi kérek. medeniyet bazirini nazaret qilip bashqurushni kücheytip, alaqidar tarmaqlar bilen birlikte qanunsiz diniy teshwiqat buyumlirini qanun boyiche tizginlishi kérek.

22-madda axbarat-neshriyat-radiyo-kino-téléwiziye tarmiqi asasiy mélodiyeni yangritip, esebiylikni tügitish jehettiki teshwiq-terbiyeni kücheytip, neshr buyumliri, radiyo, kino, téléwiziye pirogrammilirining sanini köpeytip we süpitini östürüp, pirogrammilarni tekshürüshni kücheytip, ijabiy yétekleshni ashurup, her millet ammisining esebiylikning singip kirishini angliq tosush éngini östürüshi kérek.

23-madda  qatnash-tiransport tarmiqi esebiylikni tügitish teshwiq-terbiyesini kücheytip, sahe bashqurushni chingitip, esebiylikning tarqilishi we singip kirishining aldini élishi kérek.

24-madda  sehiye-pilanliq tughut tarmiqi esebiylikni tügitish teshwiq-terbiyesini teshkillep, esebiylikning pilanliq tughut siyasitining yolgha qoyulushigha buzghunchiliq qilishining we dawalash-saqliq saqlash sorunlirida tarqilishining aldini élishi kérek.

25-madda  tor-uchur bixeterliki, iqtisad-uchurlashturush we jamaet xewpsizliki tarmiqi qatarliq tarmaqlar mesuliyiti boyiche, tor békiti, munber, mikro bilog, QQ, ündidar qatarliq öz taratqular we demalliq xewerlishish yumshaq matériyalini bashqurushni kücheytip, esebiylik mezmuni bar nachar uchurlarni waqtida bayqishi, alaqidar orun we shexslerni yollashni toxtitishqa, alaqidar uchurlarni öchürüwétishke yaki alaqidar tor béketlirini taqiwétishke, alaqidar mulazimetni toxtitishqa buyrushi kérek. alaqidar orunlar we shexsler derhal ijra qilishi hemde alaqidar xatirini obdan saqlap, tekshürüshke yardemlishishi kérek.

26-madda  télégraf mesul tarmiqi télégraf kespiy tijaretchilirining yan téléfon, awazliq sürüshtürüsh istansisi, muqim téléfon qatarliq xewerlishish qoralliridiki esebiylik mezmuni bar awaz, qaldurulma söz, sözlishish xatirisi qatarliqlarni nazaret qilish tüzümi we bixeterlik téxnikisi boyiche aldini élish tedbirini emeliyleshtürüshige heydekchilik qilip, esebiylik mezmuni bar uchurlarning tarqilishining aldini élishi kérek. télégraf kespiy tijaretchiliridin esebiylik mezmuni bar uchurni bayqighanliri yollashni derhal toxtitip, alaqidar uchurni öchürüwétip, delil-ispatlarni saqlap qélip, waqtida délo melum qilishi؛ alaqe tori arqiliq chégra halqip yollanghan esebiylik mezmuni bar uchurlarni téxnikiliq tedbir qollinip tosup qélishi, jamaet xewpsizliki orginining qanun boyiche bir terep qilishigha yardemlishishi kérek.

27-madda xelq ishliri tarmiqi nikah ishlirini, ijtimaiy teshkilatlarni tizimlash we bashqurushni qanun boyiche kücheytip, esebiylikning singip kirishining aldini élishi we uninggha taqabil turushi kérek.

28-madda  soda-sanaet memuriy bashqurush, süpet-téxnika nazaretchiliki tarmiqi qatarliq tarmaqlar tijaret ijaziti bérish, royxetke élip tizimlash we mehsulat ishlepchiqirish, tijaret qilishni bashqurushni kücheytip, uni menbesidin tosup, esebiylik terghib qilinghan buyumlarning bazargha kirishining aldini élishi hemde bazardiki esebiylik terghib qilinghan buyumlarni qanun boyiche bir terep qilishi kérek.

29-madda  yéziliq, bazarliq xelq hökümetliri, kocha bashqarmiliri yuqiri derijilik xelq hökümetlirining rehberliki we alaqidar tarmaqlarning yétekchilikide, din ishlirini bashqurushni qanun boyiche kücheytip, qanunsiz diniy heriketlerni, qanunsiz diniy teshwiqat buyumlirini tizginlep, kent ahale komitétliri, mehelle ahale komitétlirining yéngi ahale ehdinamisi tüzüp yolgha qoyushigha yétekchilik qilip, qanun idare qilish sewiyesini östürüp, daimliq tüzesh méxanizmi berpa qilip, esebiylikni tügitish xizmitini qanun boyiche obdan ishlishi kérek.

5 - bab  jemiyettiki saheler ada qilidighan mesuliyet

30-madda pütün jemiyet esebiylikni tügitish xizmitige ortaq qatnishishi kérek. her millet ammisi qanunni öginip, qanungha emel qilip, ulugh wetinimizni, jungxua millitini, jungxua medeniyitini, junggo kommunistik partiyesini, junggoche sotsiyalizmni tonup, dölet éngi, puqraliq éngi, qanun éngini, jungxua milliti ortaq gewdisi éngini kücheytip, sotsiyalistik yadroluq qimmet qarishini emelde körsitip, esebiylikni angliq tosushi we uningdin yiraqlashturushi kérek.

31-madda  ishchilar uyushmisi ishchilar uyushmisi teshkilati ichide we ezaliri arisida alaqidar qanun-nizamlar we siyaset teshwiq-terbiyesini, esebiylikni tügitish paaliyitini teshkillep qanat yaydurup, esebiylikning ishchilar uyushmisi ezaliri arisida tarqilishining aldini élishi kérek. 

32-madda  kommunistik yashlar ittipaqi yashlar-ösmürlerge millet-din siyasiti we alaqidar qanun-nizamlar toghrisida terbiye bérip, her millet yashliri-ösmürlirini alaqilishish, almashturush, arilishishqa ilhamlandurup, her millet yashliri-ösmürlirini esebiylikni tosushqa, ilghar medeniyetke intilishke, zamaniwi turmushqa uyghunlishishqa yéteklishi kérek.

33-madda  ayallar birleshmisi ayallargha ilghar medeniyet terbiyesi bérip, esebiylikning tesirige uchrighan ayallarni terbiyelesh we bashqurushni kücheytip, ularning zamaniwi medeniy jemiyetke singishishige yétekchilik qilip we yardem bérip, ularni qanunsiz diniy heriket we esebiylikni angliq tosidighan qilish kérek. 

34-madda pen-téxnika jemiyiti pütün jemiyette ilim-pen bilimlirini omumlashturushi, ilim-pen rohini ewj aldurup, ilim-pen idiyesini tarqitip, ilmiy usulni teshebbus qilip, ilim-pen hékayilirini sözlep, her millet ammisini ilmiy, saghlam, medeniy ishlepchiqirish, turmush usuligha intilishke yéteklep, ilmiy bilish iqtidarini östürüp, ularni esebiylikni angliq tosidighan we uninggha qarshi turidighan qilish kérek.

35-madda  diniy teshkilatlar diniy eqide, diniy qaidilerni dewr tereqqiyatining telipige mas halda sherhlep, esebiy diniy idiye-qarashqa reddiye bérip, esebiylikni tügitish xizmitidiki rolini jari qildurup, dingha étiqad qilidighanlarni qanun bilen diniy qaidilerning munasiwitini toghra birterep qilishqa yéteklep, ularni toghra étiqad turghuzup, esebiylikni tosup, qanungha emel qilidighan puqralardin qilip chiqish kérek. 

36-madda  soda-sanaetchiler birleshmisi, edebiyat-senetchiler birleshmisi, ijtimaiy pen sahesidikiler birleshmisi, ilmiy jemiyet, jemiyet, fond jemiyiti qatarliq birleshmiler we ijtimaiy teshkilatlar alahidiliki we üstünlükige asasen, esebiylikni tügitish xizmitini yaxshi ishlishi kérek.

37-madda  mektepler oqutquchi, oqughuchi we ishchi-xizmetchilerge bolghan millet-din siyasiti terbiyesini kücheytip, ularning bölgünchilikke, singdürmichilikke qarshi turush éngini ashurushi kérek. oqutquchilarning esebiylikni tügitishtiki yétekchilik rolini jari qildurup, oqughuchilargha ilim-penge, heqiqetke intilish, xurapatliqqa qarshi turush, esebiylikni tosush heqqide terbiye bérishi kérek. 

her qandaq teshkilat we shexsning mekteplerdiki ders munbiri, léksiye munbiri, muhakime munbiridin paydilinip, esebiy sözlerni terghib qilishi, tarqitishigha yol qoyulmaydu.

38-madda  her derijilik partiye mektepliri, memuriyet institutliri, sotsiyalizm institutliri shuningdek her xil terbiyelesh apparatliri esebiylikni tügitish terbiyesini kücheytip, esebiylikni tügitish teshwiq-terbiyesini déhqanchiliq, charwichiliq rayonliri, mehelliler, karxanilargha yüzlendürüshke türtke bolushi kérek.

39-madda  aliy mektepler we alaqidar ijtimaiy pen tetqiqat apparatliri millet-dingha dair nezeriye, siyaset tetqiqati we esebiylikni tügitish jehettiki tetqiqatni kücheytishi kérek.

40-madda diniy mektepler, dinni junggochilashturush yönilishide ching turup, diniy xadimlarni terbiyelesh-yétishtürüsh mesuliyitini estayidil ada qilip, esebiylikning singip kirishining aldini élishi kérek. 

41-madda  ammiwi teshwiqat wasitiliri, yéngi taratqular wasite we usulda yéngiliq yaritip, oxshash bolmighan obyéktlar we qobul qilghuchilarning alahidilikige asasen, esebiylikni tügitish teshwiqatini köp yollar arqiliq qanat yaydurushi kérek.

42-madda  jamaet sorunlirini bashqurghuchilar, ammiwi qatnash qoralliri, garazh, wogzal, ayrodurum qatarliqlardiki xadimlar niqabliq kiyim kiyiwalghan we esebiylik belgilirini taqiwalghanlarning jamaet sorunlirigha kirishi yaki ammiwi qatnash qorallirigha chiqishini nesihet qilip tosushi hemde jamaet xewpsizliki orginigha waqtida melum qilishi kérek.

43-madda  karxanilar esebiylikni tügitish mesuliyitini ada qilip, ishchi-xizmetchilerge ish ornini söyüp, kespini qedirlesh, qanun-nizamlargha emel qilish, ittipaq, inaq ötüsh, esebiy söz-heriketlerge qarshi turush heqqide terbiye bérishi we ularni shundaq yéteklishi kérek.

44-madda  aile we aile ezaliri qanungha emel qilishi kérek. ata-anilar perzentlirige yaxshi peziliti arqiliq tesir körsitish, perzentlirige ilim-penge, medeniylikke intilish, milletler ittipaqliqini qoghdash, esebiylikni tosush we uninggha qarshi turush heqqide terbiye bérishi kérek.

45-madda  diniy xadimlar dingha étiqad qilidighanlargha öz ara yol qoyush, inaq ötüsh idiyesini teshwiq qilip, wetenni söyüsh, tinchliqqa intilish, ittipaq ötüsh, ottura yol tutush, keng qorsaq bolush, sawabliq ish qilish qatarliq diniy eqidilerni wez éytish, tepsir qilishqa singdürüp, esebiylikke bayriqi roshen halda reddiye bérip, dingha étiqad qilidighanlarni toghra étiqad turghuzush we toghra yol tutushqa yéteklep, esebiylikning singip kirishige taqabil turush kérek.

6-bab qanun jawabkarliqi

46-madda  mushu nizamning 9-maddisidiki belgilimige xilapliq qilghanlardin qilmishi yénik bolghanlirini jamaet xewpsizliki orgini alaqidar tarmaq we orunlar bilen birlikte tüzitishke buyruydu, tenqid-terbiye béridu yaki qanun idare qilish terbiyesi béridu؛ qilmishi éghirraq bolsimu, jinayet shekillendürmigenlerge jamaet xewpsizliki orgini «jungxua xelq jumhuriyitining térrorizmgha qarshi turush qanuni», «jungxua xelq jumhuriyitining amanliq bashqurush jaza qanuni» shuningdek «shinjang uyghur aptonom rayonning <jungxua xelq jumhuriyitining térrorizmgha qarshi turush qanuni>ni yolgha qoyush charisi» boyiche jaza béridu, qanungha xilap tapawiti barlirining qanungha xilap tapawitini musadire qilidu, bashqilargha ziyan salghanliri qanun boyiche heq telep jawabkarliqni üstige alidu.

47-madda  esebiylikni tügitish xizmiti rehberlik guruppisi, tarmaqlar, orunlar we uning xadimliridin esebiylikni tügitish xizmitide mesuliyitini ada qilmighanlirigha ishleydighan orni yaki yuqiri derijilik mesul tarmaq tenqid-terbiye béridu, tüzitishke buyruydu؛ qilmishi éghir bolsa, orunning asasliq mesuligha, biwasite jawabkarlirigha qanun boyiche memuriy chare köridu.

48-madda  mushu nizamdiki belgilimige xilapliq qilip jaza kélidighan bashqa qilmish sadir qilghanlargha alaqidar qanun-nizamlar boyiche jaza bérilidu, jinayet shekillendürgenler qanun boyiche jinayi jawabkarliqqa tartilidu.

7-bab  qoshumche pirinsip

49-madda  aptonom rayonluq xelq hökümiti mushu nizamgha asasen esebiylikni tügitish konkrét belgilimisi we charisini chiqarsa bolidu.

50-madda  bu nizam 2017-yil 4-ayning 1-künidin bashlap yolgha qoyulidu.

(terjimisini aptonom rayonluq xelq qurultiyi daimiy komitéti bengungtingi qanun-nizamlarning terjimisini békitish guruppisi békitti)

menbe: shinjang qanunchiliq géziti