türkiyede «sherqiy türkistan musulmanliri» zhurnili tesis qilindi

türkiye awazi radiyosi xewiri: uzun yillardin buyan her xil zhanérdiki eserlerni bésip tarqitish bilen shughullinip kéliwatqan «teklimakan uyghur neshriyati» teripidin tesis qilinghan «sherqiy türkistan musulmanliri» namliq yérim yilliq ilmiy, siyasiy, tarixiy, edebiy zhurnalning tunji (sinaq) sani 2016 – yili iyunda oqurmenliri bilen yüz körüshti.

üch ependilerning «millitimiz türk, dinimiz islam, wetinimiz sherqiy türkistan» dégen ortaq shoarini özige shoar qilghan zhurnalning tunji sanida «muherrirdin», «ramizan éyinglargha mubarek bolsun!» namliq ramizan toghrisidiki bir parche maqale, mirkamil kashigherining «ella muhemmed iqbalning sherqiy türkistangha bolghan qarishi we pakistan siyasetchilirining xiyaniti» namliq izdinish maqalisi, «iman we muhebbetke tolghan bir hékaye» namliq bir romanning birinchi bölümi, piroféssor bedri genjerning «insanning jennettin ikkinchi qétim chüshüshi» namliq maqalisi, maykél r.drumpning «türkler teripidin teyinlengen junggo‹xaqanliri›» namliq maqalisi, kommunar talipning «muhemmed emin bughraning hayati we paaliyiti heqqide» namliq maqalisi, sewdayining «qan ichidiki bowaq» namliq powisiti, abduljélil turanning «teqiyuddin nebhani we ‹hizbuttehrir elislami› ning qurulushi» namliq maqalisi, hesen huseyin adalioghluning «siyasetname kitabi – qutadghu bilik» namliq maqalisi, emin wahidining «esletme» namliq xatirisi qatarliqlargha orun bérilgen bolup, jemiy 160 bettin terkip tapidu.

zhurnalning sahibi we bash muherriri abduljélil turan ependi, zhurnalni tesis qilish pikrining shundaqla otturigha chiqip qalmighanliqini, muhajirettiki uyghur jamaitining mushuninggha oxshash bir neshri epkargha éhtiyajining barliqining chongqur hés qilinghanliqi, bu heqte zhurnalning «muherrirdin» bölümide etrapliq toxtalghanliqini qeyt qildi. u sözini dawamlashturup, «muhajirettiki ziyaliylar qoshuni künséri zoraymaqta, bu qoshunning zhurnilimizni her xil zhaniérdiki eserliri bilen teminlishini ümid qilimen. bu zhurnalni biz neshir qilghan bolsaqmu, u eslide hemmimizning, pütkül uyghurning zhurnili... shundaq bolghaniken buni hem süpetlik hem uzun muddet chiqirish hemmimizning ortaq buchi, dep qaraymen» dédi.