tenterbiye dunyasining qelbi yer tewreshning zerbisige uchrighanlar üchün birleshti
türkiye yer tewresh apitining qaldurghan jarahetlirige keng kölemlik yardem seperwerliki arqiliq melhem bolmaqta.
türkiye awazi radiyosi xewiri: téléwiziye we radiyo qanallirining «türkiye bir qelb» namliq birleshme tarqitishida milyardlarche lira iane toplandi.
töt chong tenterbiye kulubini öz ichige alghan tenterbiye dunyasining dangliq kishiliri qatnashqan ortaq pirogramma tarqitishqa téléfon qilghan jumhur reis rejep tayyip erdoghan: «xelqimiz tarixtiki rékortni buzidighan bir san bilen (neq pul yardimi bilen) yene bir qétim özining aliyjanabliqini namayan qilidu» dédi.
yer tewreshning zerbisige uchrighan rayonlargha yardemler sel bolup éqiwatqan mushu künlerde, türkiye taratqulirimu yüzlerche téléwiziye we radiyo qanili bilen bu seperwerlikke awaz qoshup, birleshme tarqitish bérip, yardem toplash seperwerlik paaliyiti ötküzdi.
tenterbiye we senet dunyasining dangliq erbabliri bu alahide tarqitishta sehnige chiqip, yardem téléfonlirini qobul qilip, yardem toplidi؛ bu qatarda beshiktash kulubi reisi ehmet nur chebi, fenerbahche kulubi reisi eli koch , galatasaray kulubi reisi dursun özbek we trabzonspor kulubi reisi ehmet aghaoghlu qatarliqlarmu téléfon arqiliq iane toplidi.
bu alahide paaliyetke yene altay baydindir, jenk tosun, kerem aqtürkoghlu qatarliq milliy putbolchilarmu töhpe qoshti.
türkiye putbol fédératsiyesi reisi mehmet büyükekshi pirogrammigha téléfon qilip, 1 milyon lira iane qildi.
«türkiye bir qelb» namliq birleshme tarqitish jeryanida dölet ichi we sirtidin yardemler yamghur misali yéghip, milyardlarche türkiye lirasi iane toplandi.
