moskwadiki térrorluq hujumi

türkiye awazi radiyosi: 22 - mart jüme küni rusiye chong bir térrorluq hujumi bilen zilzilige keldi. térrorchilar paytext moskwadiki krokus shehiri xol-sheherlik medeniyet merkizining konsért zaligha bésip kirip, yüzdin artuq kishini öltürdi we konsért zaligha ot qoyup berdi. hujum qilghuchilarning daésh ezaliri ikenliki toghrisidiki xewerlerdin kéyin, hujum qilghuchilarrusiye-ukraina chégrasigha yéqin rayonda rusiyedin qéchishqa urunuwatqan peytte qolgha chüshti. gerche hujumning jawabkarliqini daésh üstige alghan bolsimu, emma rusiye dairiliri buning arqisida ukraina we uni qollawatqan gherb döletliri barliqini ilgiri sürüp eyiblidi.

aldinqi jüme küni (22-mart) rusiye uchrighan chong térrorluq hujumigha qarita <rusiye nuqtisidin tarixidiki eng chong térrorluq hujumi> dep baha bérishke bolidu. paytext moskwadiki krokus shehiri xol-sheherlik medeniyet merkizining konsért zaligha qoralliq unsurlarning bésip kérishi bilen 100 din artuq kishi qaza qildi we nurghun kishi yarilandi. konsért zalighimu ot qoyup bérildi. hujum qilghuchilarning kimliki toghrisida munazireler boluwatqan bir peytte, 4 hujumchi rusiye-ukraina chégrasida qolgha chüshti. bu ariliqta, daéshning xorasan guruppisi bayanat élan qilip, hujumning jawabkarliqini öz üstige aldi. ular élan qilghan beden kamérasining körünüshliri qirghinchiliqni yene bir qétim namayan qilip berdi. rusiye dairiliri bolsa, daésh mesilisige bashqiche éniqlima berdi. ular bu hujumni daésh qilghan teqdirdimu, buni teshkilleshte ukraina we uni qollawatqan gherb döletlirining qoli barliqini bildürdi. putin we médwédéw qatarliq rehberlermu biwaste mushuninggha oxshash bayanatlarni élan qildi.

derweqe, yéqinqi aylardin buyan daéshning hazir afghanistanda turushluq xurasan guruppisining aktip halgha ötkenlikini, türkiye, iran, pakistan we hazir rusiyede arqa-arqidin térrorluq hujumi qilghanliqini körmektimiz. hujum qilghuchilarning tajiklar ikenlikini we tajikistanning xitay chégrasigha jaylashqanliqinimu untumasliqimiz lazim. amérika afghanistandin chékinip chiqqandin kéyin, bu rayon goya daésh üchün hazirlanghandek qilidu. daéish ezalirini iraq we süriyedin afghanistangha muweppiqiyetlik halda yötkigen idi. amérika p k k bilen birlikte raqqeni qorshiwalghan mezgilde, daéshning muhim rehberliri we ezalirining kélishim bilen bu yerdin ayrilghanliqi shundaqla afghanistangha köchüp yerleshkenliki ashkarilanghan idi. emdilikte daéshning amérika bilen mesilisi bar döletlerge qarshi heriketke ötkenliki tolimu meniliktek qilidu. shunga, putinmu jawabni toghra yerge qayturuwatqan bolushi mumkin.

netijide moskwadiki hujum rusiyede qattiq ghezep-nepret qozghidi. rusiye jawabkar qilip körsetken ukrainagha nisbeten xelqning ghezipi téximu kücheydi. emdilikte rusiye hawa rayi we zémin sharaitining yaxshilinishini kütmekte. belkim ukrainagha chong hujum qozghishi mumkin. rusiye xelqimu ilgirikige qarighanda téximu chong urushqa teyyar haletke ötkendek qilidu. aldimizdiki aylarda ukrainada chong toqunushlargha shahit bolushimiz mumkin. eger gherb döletliri ukrainani téximu bek qollap quwwetlimigen teqdirde, urushning yüzlinishi asasen rusiyege paydiliq terepke özgirishi turghanla gep.