wanning sawatliq kümüsh pishshiqlap ishlesh seniti

türkiye awazi radiyosi: türkiyening sherqiy anadolu rayonigha jaylashqan, tarixiy urart medeniyitining paytexti bolghan wan shehiri, köli, merwayiti we nashtiliqigha oxshash qol hünerwenchilik mehsulatliri bilenmu özige layiq namgha érishti. bularning biri «sawatliq kümüsh pishshiqlap ishlesh seniti» bolup, wan soda-sanaetchiler birleshmisining iltimasigha asasen, 2017-yili 11- ayning 23 – küni türkiyening rayonlargha asasen tizimgha élinghan mehsulatliri qatarigha kirgüzüldi. sawat qoghushun, kümüsh, mis we günggürt qatarliq minéral maddilarning birleshtürülüshi asasida shekillengen qara renglik arilashma bolup, erebchidiki «qara» dégen menini bildüridighan «eswed» kelimisidin élinghan. sawatni teyyarlash üchün, aldi bilen 500 giram mis, 500 giram qoghushun, 125 giram kümüsh we 1 kilogiram günggürt bir qachigha sélinip, texminen 750 santigrat  issiqliqta éritilidu. yaxshi arilashturulup qara rengge özgiridighan bu arilashma métal qachigha quyulup sowutilidu. obdan sowutulghan arilashma qachidin élinip, sendelning üstige qoyulup parchilinidu, andin hawanchigha sélip ézilip, parashoktek uwaq haletke keltürülidu. andin, ézilgen bu parashokqa boraks maddisi qoshulup, suyuq lay hasil qilinidu. bu lay kümüsh tamakidanlargha, tamaka qapchuqlirigha, at égerliri, tesbihler qatarliq nersilerni zinnetleshte ishlitilidu. bu qol hünerwenchilik bilen shughullanghuchilarning öz hüner-senitining ustazi bolushi we tesewwur küchining yuqiri bolushi intayin muhim. tarixi miladidin burunqi chaghlarghiche sozulidighan sawat, yuqiri karatliq kümüshtin yasalghinida, süpetlik kümüshning aq renggi bilen qara renglik sawatning siziqliri körünerlik sélishturma peyda qilidu. sawatliq kümüsh bézekchilikining yene bir muhim alahidiliki shuki, kümüshte orun alidighan neqishning polat uchluq inchike qelem bilen oyulishidur. bügünki künde, wandiki 4 ayrim séxta pishshiqlap ishlinidighan mehsulatlarning hemmisi dégüdek éksport qilinmaqta.