конйа тонур пөриси (самсиси)
илкәр ташқин тәрипидин тәййарланған «түркийәниң районларға асасән тизимға елинған мәһсулатлири» намлиқ сәһипимизниң бу йиллиқ тунҗи санида, «конйаниң тонур пөриси» тоғрисидики учурларни силәр билән ортақлишимиз.
конйа тонур пөриси
түркийә авази радийоси: түркийәниң оттура анадолу райониға җайлашқан тарихий шәһәр конйа, түрк йемәк-ичмәк мәдәнийитиниң охшимиған түрлиригә саһибханлиқ қилмақта. бу йемәк – ичмәк мәдәнийитиниң келип чиқиши, көчмән турмуштин муқим турмушқа өтүшниң изналирини өзигә муҗәссәм қилған болуп, таамларни тәййарлашта тонурдин пайдилиниш анадолудики әнәниви адәтләрниң бири. конйа шәһәрлик һөкүмәтниң илтимасиға асасән, 2023- йили түркийәниң районларға асасән тизимға елинған мәһсулатлири сепигә қошулған «конйа тонур пөриси», буғдай уни, су, туз вә йеңи ечитқу билән йуғурулған хемирниң ичигә қийма йаки башқа нәрсиләр селинип, тонурда пишурулиду. ечилған хемирниң ичигә адәттә қой сүтидин тәййарланған пишлақ билән районниң дора өсүмлүклиридин тәййарланған арилашма хуручлар селиниду. униңдин башқа пийаз билән арилаштурулған қийма йаки бәрәңгә салидиған әһвалларму бар. пөрини тәййарлаш үчүн, алди билән йоғурулуп бир дәм тиндурулған хемир, тәң алтә бөләккә айрилиду. зувулланған алтә парчә химер 20 сантиметир чоңлуқта йумилақ ечилип, оттурисиға тәхминән 100 грам әтрапида хуруч қойулиду, андин хемирниң оң вә сол қисми үсти тәрәптә бирләштүрүлиду. пөриниң хемири тәхминән 25 сантиметир кәлгүдәк шәкилдә асти тәрәпкә созулиду. тәййарланған хемир отун селип тиндүрүлған тонурға йеқилиду. көйүп кәтмәслики үчүн, пөриниң отқа қарайдиған тәрипи һөл қилиниду. пишиш җәрйанида, өрләп думбақлишивелип, ичидики хуручларниң төкүлүп кәтмәслики үчүн, пөрини үсти тәрипи тешиветилиду. 10 – 15 минут ичидә отқа қақланған қисми қизиридиған пөрә, төмүр қисқач билән тонурдин елинип, қизиқ чеғидила хемир бирләштүрүлгән йәрлиридин кесилиду. бу җәрйанда, башқа бир қачида еритип тәййарланған сериқ май, пөриниң үсти вә ичигә төкүлиду. конйа тонур пөриси қизиқ һалитидә меһманларға тәқдим қилиниду.
