yutqunchaq yallughini tebiiy dawalash usulliri

(doktor mehmet uchar)

: yutqunchaq yallughi dégen néme?

 yutqunchaq yallughi éghiz we burun boshluqining arqisidiki yutqunchaq rayoni yallughidur. boghuz aghriqi depmu atilidighan yutqunchaq yallughi boghuzda qichishishni keltürüp chiqiridu we yutushni qiyinlashturuwétidu.

yutqunchaq yallughining aldini élish tedbirliri:

• qolni pakiz we daim yuyush,

• hötelgen yaki chüshkürgen chaghda éghiz - burunni yépish,

• yuqumluq wirus yaki baktériyedin yuqumlanghanlar bilen qoyuq alaqe qilishtin saqlinish,

• tamaka chékish we tamaka isidin saqlinish,

• chang-tozanliq we meynet hawa muhitida qélishtin saqlinish,

• heddidin ziyade issiq we soghuq yémekliklerni istémal qilishtin saqlinish,

• imkaniyetning bariche xizmet we yashash sahelirining hawasini almashturush,

• ximiyelik ghidiqlighuchi maddilar bilen uchrishishtin saqlinish.

yutqunchaq yallughini tebiiy dawalash usulliri:

kündüzi köp su ichish, ilman tuz süyi bilen gharghara qilish, toxu shorpisi qatarliq shorpilarni ichish we aram élish yutqunchaq yallughini tebiiy dawalash usullirining bir qismidur.

• yutqunchaq yallughigha giriptar bolup qalghan mezgilde juxargüli, pinne, leyligül, échinaséye, lipa we chüchükbuya qatarliq ösümlük chaylirini ichish,

• suni köp ichish arqiliq boghush qurushni azaytish,

• ilman tuz süyi bilen gharghara qilish,

• hesel istémal qilish arqiliq boghuzning ghidiqlinishni azaytish,

• kéchisi boghuz quruydighanliqi üchün, pat-pat ilman su ichish.

• toxu shorpisi ichish boghuzni tinchlanduridu,

• aram élish paydiliqtur.

 yutqunchaq yallughigha shipaliq tebiiy dorilar we tebiiy dawalash usulliri:

. chöl yalpuzi, échinaséye qatarliq ösümlüklerning shipaliq rolidin paydilining.

échinaséye we chöl yalpuzi boghuz aghriqini we qichishishni peseytidu. chöl yalpuzi baktériyeni yoqitish we qizitma qayturush dorisidur. échinaséye bolsa immunitét sistémisini kücheytish dorisi hésablinidu. chöl yalpuzi chéyida gharghara qilsingizmu yaki uni ichsingizmu bolidu.

ghargha qilinidighan chöl yalpuzi chéyi teyyarlash usuli:

 bir istakan qaynaq sugha bir hesel qoshuqi chöl yalpuzi chéyi yaki 5 ~ 4 giram qurutulghan chöl yalpuzi ilawe qilinidu, andin töwen otta 10 minut qaynitilidu. sowughandin kéyin künde 2 yaki 3 qétim gharghara qilinidu. bu arilashmini 24 saet ichide istémal qilip bolush kérek.

 xam samsaq istémal qiling.

boghuz aghriqi üchün samsaq ishlitishning eng yaxshi usuli, samsaqni xam péti chaynap yutush yaki bir parche élip, uda 15 minut shümüshtur. izip hesel yaki zeytun yéghi qoshsingiz, xam samsaqni yutush téximu asan bolidu.

boghuz aghriqi üchün samsaq ishlitishning yene bir usuli mundaq:

awwal bir hesel qoshuqichilik samsaq ézilidu, andin bir istakan qaynaq sugha ézilgen samsaq, yérim chay qoshuqi darchin, bir qoshuq limon süyi ilawe qilinip, 2 minut demlinidu. bu arilashma künde ikki qétim süzüp ichilidu.

. doriliq pinne chéyi iching.

paydiliq terepliri nahayiti köp bolghan pinne, chaynisa yutqunchaq yallughighimu shipaliqtur. pinne boghuz aghriqini toxtitip, quruq yötelni peseytidu. pinneni chay demlep ichishkimu bolidu.

 alma sirkesi.

alma sirkesini yutqunchaq yallughini dawalashta ishlitish usuli:

aldi bilen, bir qoshuq organik alma sirkesi bir istakan ilman sugha arilashturulidu, andin bu arilashmigha bir qoshuq hesel ilawe qilinip, künde bir yaki ikki qétim ichilidu. buningdin bashqa yene, boghuzda gharghara qilghanda baktériyeni öltüridighanliqi üchün, alma sirkesi yutqunchaq yallughini dawalashta ünümlük rol oynaydu.

 zenjiwil

bir hesel qoshuqi zenjiwil rendilengendin kéyin, bir istakan suda 5 minut etrapida qaynitilidu, andin süzülüp, bir nechche tamche limon süyi we yérim qoshuq hesel qoshup ichilidu.

zerchiwe

yérim hesel qoshuqi zerchiwe talqini bilen bir qoshuq tuzni bir istakan sugha arilashturup, künde ikki qétim gharghara qilghanda, yutqunchaq yallughini dawalashta nahayiti yaxshi ünümge érishkili bolidu. qaynitish hajetsiz bolghanliqtin, teyyarlash nahayiti asan bolghan bu arilashmini künde 2 yaki 3 qétim ichishke bolidu.

 hesel

bir qoshuq hesel bilen bir qoshuq organik alma sirkesini arilashturup, her 4 saette bir qétim istémal qilishqa bolidu.

 tuz süyi bilen gharghara qilish:

üch hesel qoshuqi tuzni ikki istakan ilman sugha sélip arilashturulidu. bu arilashma arqiliq künde birqanche qétim gharghara qilinidu. bu usul 3 kündin 5 küngiche dawamlashturulidu.