meshhur tiyatir senetchisi rasim öztekin wapat boldi

türkiye awazi radiyosi xewiri: rasim öztekin 7-mart (2021) tuyuqsiz yürek késilining qozghilishi bilen deslepte istanbul beykoz dölet doxturxanisida, arqidin doktor siyamiye ersek yürek we ménge-tomur telim-terbiye we tetqiqat doxturxanisida balnéstqa élinghan idi.

rasim öztekin tünügün (2021-yili 8-mart) doxturxanida qutquzush ünüm bermey bu dunya bilen xoshlashti.

türkiye jumhur reisi rejep tayyip erdoghan senetchi rasim öztekinning wapatidin kéyin, teziye télégrammisi élan qildi.

u: «dölitimizning qimmetlik senetchiliridin rasim öztekinning wapatidin chongqur qayghurdum. rasim öztekinge allahtin rehmet, ailisige we barliq yéqin-yoruqlirigha, senetchilirimizge sewr tileymen» dédi.

türkiye büyük millet mejlisi (parlaménti) bashliqi mustafa shentopmu rasim öztekinning wapati munasiwiti bilen twittérda sewr tilep: «qimmetlik tiyatir we kino artisi, bir enenining axirqi wekilliridin rasim öztekinning wapat bolghanliqini qayghu ichide anglidim. uninggha allahtin rehmet, ailisige we barliq yéqin-yoruqlirigha sewr tileymen, makani jennet bolsun» dédi.

muawin jumhur reis fuat oktay twittérda: «qisimliq téléwiziye tiyatiri we kinochiliqimizning yaxshi körüshke érishken senetchi rasim öztekinning wapat bolghanliqini chongqur qayghu ichide anglidim. rasim öztekinge allahtin rehmet, musibetlik ailisige we barliq yéqin-yoruqlirigha sewr tileymen» dédi.

türkiye radiyo-téléziye idarisi- t r t (TRT) mudiriyitining bashliqi we bash mudiri ibrahim eren: «t r t ailisining qimmetlik ezaliridin biri, ‹seksenler› namliq qisimliq téléwiziye tiyatiri we shuningdek kino, tiyatir senetchisi rasim öztekindin ayrilip qalduq. salametliki yaxshilinip tiyatir sehnisige qaytishini ümid qiliwatqinimizda, bizge kelgen shum xewerdin chongqur qayghurduq. allah hemmimizge sewr ata qilsun, allah rehmet qilsun» dédi.