dunya musulman ölimalar birliki: erdoghanning bayanatidin intayin xursenmiz
dunya musulman ölimalar birliki jumhur reis rejep tayyip erdoghanning hamasning «térrorluq teshkilati» emes, eksiche «öz zéminini qoghdash yolida küresh qiliwatqan qarshiliq körsitish herikiti» dep atishidin intayin xursen ikenlikini bildürdi.
türkiye awazi radiyosi xewiri: dunya musulman ölimalar birliki teripidin bu heqte élan qilinghan yazma bayanatta, jumhur reis rejep tayyip erdoghanning girétsiye bash ministiri kériyakos michotakisning hamasni térrorluq teshkilati dep atishigha qarshi chiqqqanliqi we uni «öz zéminini qoghdawatqan qarshiliq körsitish herikiti» dep atighanliqi tekitlinip mundaq déyildi:
«jumhur reis erdoghanning bu bayanati mezlumlarning zepiridur, zalimlargha qarshi urush élanidur, allahning ewliyaliri (dostliri) ning ghelibisidur, shundaqla, bu allahning düshmenlirige qarshi urush élan qilishtur. derweqe, bu bayanat dunyaning herqaysi jayliridiki mezlumlargha teselliydur. türkiyening herdaim mezlumlarni baghrigha basidighanliqining, yönilishi we qiblisini özgertmigenlikining signalidur.»
«jumhur reis erdoghanning bu shekildiki küchlük bayanatliri we shereplik pozitsiyesi pütkül dunya musulmanliri teripidin qizghin alqishqa érishti, shundaqla musulman ölimalar we islam ümmitining duasigha érishti.»
osmanli impériyesi sultanliridin sultan ikkinchi abdulhemid xan (1876- 1909 - yillar) ning pelestin zéminigha tutqan pozitsiyesi (pelestin zéminini qoghdash yolida körsetken tirishchanliqliri) ning nahayiti zor ehmiyetke ige ikenliki tekitlengen bayanatta, jumhur reis rejep tayyip erdoghanning bayanatliriningmu özlirige sultan abdulhemid xanni xatiriletkenliki qeyt qilindi.
