ghezzede öltürülgen b d t xadimlirining sani 189 gha yetti
israiliye uda 7 aydin köprek waqittin buyan dawamliq hujum qiliwatqan ghezze rayonida öltürülgen birleshken döletler teshkilati xadimlirining sani 189 gha yetti.
türkiye awazi radiyosi xewiri: birleshken döletler teshkilati yéqin sherqtiki pelestin musapirlirigha yardem bérish we mulazimet orgini ghezze rayonining nöwettiki weziyiti heqqide doklat élan qildi.
israiliyening hujumlirining minglarche puqraning ölüp kétishi, pelestinliklerning öy – makanliridin ayrilip qélishigha seweb boluwatqanliqi we pelestinning ul eslihelerge ziyan yetküzüwatqanliqi qeyt qilinghan bayanatta tekitlinishiche, israiliye armiyesi ghezze shehiri, jenubtiki refah shehirining sherqiy qismi, refah we kerem ebu salim chégra éghizlirigha quruqluqtin dawamliq hujum qilmaqta iken.
israiliye armiyesining 2023 – yili 7 – öktebirdin buyan dawamlashturuwatqan hujumlirida öltürülgen birleshken döletler teshkilati yéqin sherqtiki pelestin musapirlirigha yardem bérish we mulazimet orgini xadimlirining sani 189 gha yetken.
birleshken döletler teshkilati insanperwerlik ishlirini maslashturush ishxanisining sanliq melumatliri neqil keltürülgen doklatta qeyt qilinishiche, éhtiyaj künséri éshiwatqan bolsimu, insanperwerlik yardem teshkilatliri ghezzening shimalini öz ichige alghan rayonlardiki mudapiesiz halettiki kishilerni ziyaret qilishta dawamliq tosqunluqqa uchrimaqta iken.
israiliye dairiliri 1-maydin 9-mayghiche ghezzening shimaliy üchün pilanlanghan 32 insanperwerlik yardimi xizmitining peqet 9 inila qolaylashturghan, 5 insanperwerlik yardimi herikitini biwasite ret qilghan, 11 ige tosqunluq qilghan, 7 si arqa septiki tosalghular sewebidin emeldin qaldurulghan.
doklatta, israiliye dairiliri oxshash mezgillerde ghezzening jenubidiki hemkarlishish zörür bolghan rayonlarda 46 insanperwerlik yardem xizmitining 25 ini qolaylashturghanliqi , 9 ni ret qilghanliqi, 3 ni tosqanliqi we eshya oboroti mesilisi sewebidin 9 ni emeldin qaldurghanliqi tekitlinip mundaq déyilgen:
«israiliyening refah rayonidiki herbiy herikiti insanperwerlik yardem teshkilatlirining ghezzege muhim insanperwerlik yardem buyumlirini yetküzüshige biwasite selbiy tesir körsetmekte.»
