isirailiye armiyesi ghezzede urushni dawamlashturush pilanini testiqlidi
isirailiye armiyesi ishtab bashliqi xérzi xaléwining ghezzediki urushni dawamlashturush pilanini testiqlighanliqini élan qildi.
türkiye awazi radiyosi xewiri: isirailiye armiyesining éks (X) bétide, ghezzediki urushni dawamlashturush pilanining testiqlanghanliqi toghrisida yazma bayanat élan qilindi.
bayanatta, xaléwining isirailiye jenubiy herbiy rayonining qomandani yaron finkélman we bezi qomandanlar bilen körüshüp, ghezzediki urushni dawamlashturush pilanini testiqlighanliqi qeyt qilindi.
isirailiyening «walla» (Walla) tor bétining xewiridimu armiye ishtab bashliqining refahni ishghal qilish herbiy herikitige munasiwetlik pilanlarni testiqlighanliqi bildürüldi.
isirailiye ashqun ongchi maliye ministiri bézalél smotrich tünügün (28-aprél) nétanyahu bashchiliqidiki hökümetning refahni shighal qilalmighan ehwalda mewjut bolup turushining mumkin emeslikini éytqan idi.
isirailiye hökümiti hamas bilen esir almashturush muzakirelirige «axirqi purset» ni bérishke teyyar ikenlikini, emma ilgirilesh körülmigen ehwalda refahqa quruqluq herikitining bashlinidighanliqi toghrisidiki uchurni misirning munasiwetlik dairilirige yetküzgen idi.
