shotlandiyening musulman bash ministiri istépa berdi

türkiye awazi radiyosi xewiri: shotlandiye bash ministiri hemze yusuf shotlandiye merkizi édinburgdiki bash ministirliq mehkimiside axbarat élan qilip, bash ministirliq hoquqidin we partiyesining rehberlikidinmu istépa béridighanliqini bildürdi.

u ötken hepte partiyesi bilen hökümettiki shériki yéshillar partiyesi otturisida hoquq bölüshüsh kélishimini axirlashturghanliqlirini eskertip, yéshillar partiyesi seweb bolghan ümidsizlikini aldin perez qilalmighanliqlirini qeyt qildi.

u hoquq tutush üchün pirinsiplardin waz kechmeydighanliqlirini, kélishim bilen ishench awazigha érishishning mumkinlikini, emma hepte axiridiki weziyetni oylighandin kéyin, istépa bérishni qarar qilghanliqini, ornigha yéngi bash ministir saylanghiche wezipisini dawamlashturidighanliqini eskertti.

u shotlandiye bash ministiri bolushning özi üchün chong sherep ikenlikini we shotlandiyening engliyedin ayrilip musteqil bolushigha yéqin hés qiliniwatqan bir waqitta, hoquqidin istépa bergenlikini tekitlidi.

u: «parlamént ezasi bolush süpitim bilen, dunyaning közi aldida eng qorqunchliq insaniy tiragédiyelerni bashtin kechürüwatqan ghezzege oxshash dölet ichi we sirtida awazini anglitalmaywatqanlarning awazi bolimen, partiyemning xizmetlirinimu yéqindin qollaymen, bolupmu shotlandiyening musteqilliqini dawamliq qollaymen» dédi.

ötken hepte shotlandiye memliketlik partiyesi bilen yéshillar partiyesi bulghima qoyup bérish pilanida körülgen ixtilaptin kéyin 3 yil dawamlashqan ittipaq buzulghan idi.