ereb elliri ittipaqi amérika bilen yawropani israiliyege qoral éksport qilmasliqqa chaqirdi

türkiye awazi radiyosi xewiri: ereb elliri ittipaqi daimiy wekiller derijilik jiddiy yighin chaqirip, israiliye armiyesi 202 kündin buyan hujum qilishni dawamlashturuwatqan ghezzediki özgirishlerni muzakire qildi.

misir resmiy xewer agéntliqi  «MENA» ning xewirige qarighanda, ereb elliri ittipaqi israiliyening ghezze, gherbiy qirghaq (iyordan deryasining gherbiy qirghiqi) we mesjidi eqsadiki pelestin xelqige qaratqan hujumliri we irqiy qirghinchiliq jinayitini dawamlashturushini qattiq eyibligen.

israiliye armiyesining refah shehirige hujum qilish muddiasining pelestin xelqige qaritilghan yéngi bir qirghinchiliqtin dérek béridighanliqini otturigha qoyup agahlandurghan ereb elliri ittipaqi, birleshken döletler teshkilati (b d t) xewpsizlik kéngishining <israiliyening urush toxtitish qararigha riaye qilishi we insanperwerlik yardemlerning yetküzülüshige kapaletlik qilishini mezmun qilghan b d t nizamnamisining 7-babidiki maddilargha asasen yene bir qétim qarar chiqirishi>ni telep qilghan.

ereb elliri ittipaqi amérika qoshma ishtatlirining pelestinning b d t gha toluq eza bolush iltimasini ret qilishini eyiblep, amérika we yawropa ittipaqi döletlirini israiliyege qoral-yaragh we oq-dora éksportini toxtitishqa hemde israiliyening pelestin xelqige irqiy qirghinchiliq yürgüzüshte ishlitiwatqan uchquchisiz hawa apparatlirini ishlepchiqirish türlirini meblegh bilen teminleshtin waz kéchishke chaqirghan.

israiliye armiyesining 2023-yili 7-öktebirdin buyan dawamlashturuwatqan ghezze hujumlirida qaza qilghan pelestinlikler sani14685 i kichik bala, 9760i ayal bolup, jemiy 34262 ge, yarilanghanlar sani 77229 gha yetti.