bélorusiye pirézidénti aléksandir lukashénko: «nato bizni urushqa sörep kirmekchi»
bélorusiye pirézidénti aléksandir lukashénko shimaliy atlantik ehdi teshkilatining herbiy küchini bélorusiyening gherbiy chégrasigha merkezleshtürgenlikini bildürüp, «bizni urushqa sörep kirmekchi» dédi.
türkiye awazi radiyosi xewiri: pirézidént lukashénko asasiy qanungha tüzitish kirgüzüsh arqiliq eng yuqiri wekillik orginigha aylanghan bélorusiye xelq mejliside nutuq sözlidi.
lukashénko shimaliy atlantik ehdi teshkilatining herbiy küchini bélorusiyening gherbiy chégrasidiki polsha we baltiq déngizi döletlirige merkezleshtürgenlikini we shimaliy atlantik ehdi teshkilatining istratégiyelik yadro qorallirini zamaniwilashturushni dawamlashturiwatqanliqini, buninggha qarita özliriningmu oxshash iqtidargha ige qorallarni bazilargha orunlashturghanliqini eskertti.
lukashénko: «bir nerse éniq, ular bizni heqiqeten urushqa sörep kirishni xalaydu. bash qomandan bolush süpitim bilen menmu, armiyemizmu we alahide etretlirimizmu buni körmekte. ular bizni qutritip, xendek kolawatidu. herbiy ul esliheliri we qorallirini zamaniwilashturuwatidu. biz chégraning yene bir teripide tinch turmush berpa qiliwatimiz, xendek kolimaywatimiz. emma bizning tinchliqni söyüshimiz passipluq emes. bu arilashturup qoyulmisun» dédi.
lukashénko tehditlerning küchiyishige egiship bélorusiyening simmétrik tedbirlerni qollinidighanliqini we jeng qilish küchini ashuridighanliqini tekitldi we: «bizni simmétrik bolmighan tedbir qollinishqa mejburlimanglar» dep agahlandurushta boldi.
