israiliye herbiy istixbarat idarisining bashliqi meghlubiyitini étirap qilip istépa berdi
israiliye herbiy istixbarat idarisining bashliqi général mayur axaron xaliwa 7 - öktebir (2023) diki hujumni keltürüp chiqarghan meghlubiyiti sewebidin istépa bérishni qarar qildi.
türkiye awazi radiyosi xewiri: israiliye herbiy istixbarat idarisining bashliqi général mayur xaliwa istépanamesini ishtab bashliqi xérzi xaléwigha tapshurdi.
xaliwa istépanameside, «méning qomandanliqimdiki istixbarat tarmaqliri wezipisini orunliyalmidi. urushning azabini menggüge kötürüp yurüydighan boldum, emdi jawabkarliqni qobul qilip, wezipemni axirlashturushni xalaymen» dep yazdi.
israiliye armiyeside uning ornigha olturidighan kishini belgilesh zörür bolghachqa, xaliwaning istépanamesining qachan küchke ige bolidighanliqi téxiche namelum.
xaliwa 7 - öktebirdiki hujumdin kéyin meghlubiyitini étirap qilip, istépa bérishni qarar qilghan israiliyening tunji yuqiri derijilik herbiy emeldari bolup qaldi.
israiliye armiyesining 7 - öktebirdiki hujumni keltürüp chiqarghan meghlubiyiti heqqide armiye ichide tekshürüsh bashlash üchün her qaysi qomandanliqlargha yolyoruq chüshürülgenliki bildürülgen idi.
israiliye armiyesi teripidin mart (2024) ning béshida élan qilinghan yazma bayanatta, pelestin qarshiliq körsitish herikiti- hamasning herbiy qaniti izzeddin elqassam birigadilirining 2023 - yili 7-öktebirde hujum teyyarliqi qiliwatqanliqini bayqiyalmighan yaki hujum qilishtin ilgiri yéterlik tedbirlerni alalmighan israiliye qisimlirining öz ichide tekshürüsh élip baridighanliqi uqturulghan idi.
