amérika teywen, ukraina we israiliyege 95 milyard dollarliq yardem béridighan boldi
amérika awam palatasida ötküzülgen bélet tashlashta, ukraina, israiliye we teywenge 95 milyard dollarliq yardem teklipi qobul qilindi.
türkiye awazi radiyosi xewiri: jumhuriyetchiler partiyisi köp sanliqni igileydighan awam palatasi, ukraina hökümitining rusiyege qarshi urushta bayliq zapisi érip kétish aldida turghan bir peytte, 6 ayliq siyasiy qatmalliqqa xatime bérip, israiliye we teywenge qilinidighan yardemlerni qoshqanda jemiy 95 milyard dollarliq yardem bérish qanun layihisini testiqlidi.
awam palatasining jumhuriyetchi bashliqi mayk jonson démokratchilar bilen birlikte heriket qilip, öz partiyisidiki qarshi pikirlerni basturdi we bu qanun layehisi ikki partiyening teng qollishi bilen 122ret awazgha qarshi 311 qollash béliti bilen qobul qilindi.
amérika pirézidénti jo baydin we démokratchilar köp sanliqni igileydighan kéngesh palatasiningmu bu yardem pilanini seyshenbe küni testiqlash éhtimali barliqi mölcherlenmekte.
awam palatasi maqullighan 95 milyard dollarliq yardem pilani, ukrainagha 61 milyard dollar yardem bérishtin bashqa yene, israiliyege 26 milyard dollar, hindi-tinch okyan rayonidiki teywenning bixeterliki üchün 8 milyard dollar yardem bérishni öz ichige alidu.
israiliyege ajritilghan 26 milyard dollarliq yardem pilani ichidiki 9 milyard dollarning bolsa, ghezze qatarliq her qaysi urush rayonlirigha yollinidighan insanperwerlik yardem boyumlirigha ishtilishi pilanlanmaqta.
bu ariliqta israiliye bash ministiri bényamin nétanyahu ijtimaiy alaqe torida amérika awam palatasidiki bélet tashlashta israiliyege 26 milyard dollarliq tarixiy ehmiyetke ige yardem pilanining qobul qilinghanliqigha rexmet éytti.
nétaniyahu yazmisida, amérika awam palatasining israiliye «qedirleydighan» yardem pilanini maqullishining démokratchilar we jumhuriyetchilerdin ibaret her ikki partiyening israiliyeni qollap quwwetlengenlikini shundaqla gherb medeniyitini qoghdashni namayan qilghanliqini bildürdi.
