G7 dölet guruhi iranni eyiblidi
amérika, engliye, firansiye, kanada, gérmaniye, italiye we yaponiyedin teshkillengen G7 dölet guruhi, iranning isirailiyege hujum qilghanliqini qattiq eyiblidi.
türkiye awazi radiyosi xewiri: G7 dölet guruhining rehberliri nöwetchi reis döliti italiyening telipi bilen, iranning isirailiyege qilghan hujumi üstide söhbet ötküzüsh meqsitide sinliq tor yighini ötküzdi. yighindin kéyin xitabname élan qilindi.
xitabnamede mundaq déyildi:
«G7 dölet guruhi rehberliri bolush süpitimiz bilen, iranning isirailiyege qilghan biwaste we buningdin ilgiri körülüp baqmighan hujumlirini qattiq eyibleymiz. iran isirailiyege yüzlerche uchqu we bashqurulidighan bomba qoyup berdi, isirailiye ittipaqdashlirining yardimi bilen hujumni tosup qaldi. isirailiye xelqi, döliti bilen hemkarliq ichidimiz we toluq qollaymiz. isirailiyening bixeterlikini qoghdash küchlük iradimizni yene bir qétim namayan qilimiz. iranning hujumi rayonda eslidinla jiddiy bolghan weziyetni téximu ulghaytiwetti. iranning rayondiki hujumlirini toxtitishini telep qilimiz. iranning rayon weziyitini téximu muqimsizlashturidighan heriketlirige qarshi qoshumche tedbirlerni élishqa teyyarmiz.»
G7 dölet guruhi rehberliri ghezzediki kirizisni axirlashturushni muzakire qilip, esirlerni qoyup bérish, insanperwerlik yardemlirini yetküzüsh we uzun muddetlik urush toxtitishni emelge ashurush üchün körsitiliwatqan tirishchanliqlarni dawamlashturushni tekitlidi.
yawropa ittipaqi kéngishining bashliqi charléz mishél éks (X) adrésida élan qilghan bayanatida, « G7 dölet guruhi rehberlirining iranni eyibligenlikini we barliq tereplerge salmaq bolushni chaqiriq qilghanliqini bildürdi.»
u 17-18-aprél künliri ötküzülidighan yawropa ittpaqi rehberler yighinida, ghezzede urush toxtitish mesilisining muzakire qilinidighanliqini eskertti.
