iran israiliyedin öch élishning yolluq qoghdinish hésablinidighanliqini otturigha qoydi
iran tashqi ishlar ministiri hüseyin emir abdullahiyan iranning demeshiqtiki konsulxanisigha qilinghan hujumdin kéyin, israiliyedin öch élishqa «yolluq qoghdinish» dep qaraydighanliqlirini bildürdi.
2127024
türkiye awazi radiyosi xewiri: iran tashqi ishlar ministirliqi yazma bayanat élan qilip, abdullahiyanning gérmaniye tashqi ishlar ministiri annéléna baérbok bilen ötküzgen téléfon söhbitide, bérlinning israiliyege qarshi soghuqqanliq bilen heriket qilish chaqiriqini qobul qilmighanliqini jakarlidi.
bayanatta körsitilishiche, nöwettiki saqliniwatqan mesililerni hel qilishning birdinbir charisining israiliyening ghezzediki hujumlirini toxtitish ikenlikini otturigha qoyghan abdullahiyan: «gérmaniyening ghezzede urush toxtitishni qolgha keltürüsh tirishchanliqining netijisiz bolushining sewebini, gérmaniyening irqiy qirghinchiliq dawam qiliwatqanda biterep turalmasliqidin izdesh kérek» dégen.
u yene, dölitining israiliyening 1-aprélda demeshiqtiki iran konsulxanisigha qilghan hujumigha qayturghusi inkasi heqqide toxtilip: «israiliye hakimiyiti xelqara qanun, wiyénna ehdinamisi, insanlar we diplomatik orunlarning chéqilalmasliq hoquqi qatarliqlarni pütünley depsende qilghan ehwallarda, hujumchini jazalash yolluq qoghdinish üchün sherttur» dégen.
yene bir tereptin, iranning birleshken döletler teshkilati (b d t) diki wakaletxanisi yazma bayanat élan qilip, eger b d t xewpsizlik kéngishi israiliyening hujumidin kéyin, hujumni eyiblep, jawabkarlarni sotlash yolida qedem tashlighan bolsa idi, <iranning israiliyeni jazalash éhtiyaji qalmighan bolatti>» dégenlerni qeyt qildi.
israiliye 1-aprél iranning demeshiqtiki elchixanisining konsulxana binasigha hawadin hujum qilip, iran inqilab muhapizetchiliri qisimlirining ikki généralini öz ichige alghan yette eskirini öltürgen. hujumda yene suriye puqrasi alte kishi hayatidin ayrilghanidi.
