شىۋېيتسارىيە ئۇكرائىنا تىنچلىق يىغىنىغا ساھىبخانلىق قىلىدۇ

تۈركىيە ئاۋازى رادىيوسى خەۋىرى: شىۋېيتسارىيە فېدېراتىپ ھۆكۈمىتى يازما بايانات ئېلان قىلىپ، ئۇكرائىنانىڭ كەڭ دائىرىلىك، ئادىل ۋە ئۇزاق مۇددەتلىك تىنچلىقىغا كاپالەتلىك قىلىش ئۈچۈن، يۇقىرى دەرىجىلىك رەھبەرلەرنىڭ ئىشتىراك قىلىشى بىلەن <ئۇكرائىنا تىنچلىق يىغىنى> ئۆتكۈزۈلىدىغانلىقىنى ئۇقتۇردى.

«يىغىن تىنچلىق مۇساپىسىگە باشلامچى بولالايدىغان زۆرۈر شارائىت ھازىرلاندى» دېيىلگەن باياناتتا، يىغىننىڭ مەقسىتىنىڭ دۆلەتلەر ئارا  <ئۇكرائىنادا تىنچلىق ئورنىتىش> ئورتاق تونۇشىنى ئۆستۈرۈش ئىكەنلىكى قەيت قىلىندى.

يىغىننىڭ ئىيۇندا شىۋېيتسارىيەنىڭ بۇرگېنستوك بازىرىدا ئۆتكۈزۈلۈشىنىڭ پىلانلانغانلىقى بىلدۈرۈلدى.

شېۋىتسارىيە پايتەختى بېرندا دۆلەت ئىشلىرى زىيارىتىدە بولغان ئۇكرائىنا پىرېزىدېنتى ۋىلادىمىر زېلېنسكىي 15-يانۋار شىۋېيتسارىيە فېدېراتسىيەسى رەئىسى ۋىئولا ئامخېرد بىلەن كۆرۈشكەن ۋە ئۇنىڭ بىلەن ئۆتكۈزگەن قوشما مۇخبىرلارنى كۈتۈۋېلىش يىغىنىدا سۆز قىلىپ، ئۆزلىرىنىڭ شىۋېيتسارىيە بىلەن بىرلىكتە تىنچلىق يىغىنى تەييارلىقلىرىنى 16-يانۋاردا باشلايدىغانلىقلىرىنى ئۇقتۇرغانىدى.

زېلېنسكىي يىغىنغا پەقەت ئۇكرائىنانىڭ زېمىن پۈتۈنلۈكىنى قوللايدىغان دۆلەتلەرنىڭلا تەكلىپ قىلىنىدىغانلىقىنى، رۇسىيەنىڭ سۆھبەتكە قاتناشمايدىغانلىقىنى، خىتاينىڭ قاتنىشىشىنى ئۈمىد قىلىدىغانلىقىنى ئەسكەرتكەنىدى.