hamas rehbirining üch oghli bilen töt newrisi israiliyening hujumida hayatidin ayrildi

türkiye awazi radiyosi xewiri: israiliyening ghezzening gherbige jaylashqan eshshati musapirlar lagérida kétiwatqan bir mashinigha qilghan hujumida pelestin islamiy qarshiliq körsitish herikiti — hamasning siyasiy biyurosi bashliqi ismail heniyyening üch oghli bilen töt newrisi hayatidin ayrildi.

weqeni öz közi bilen körgüchilerning bildürüshiche,  israiliye roza héyt munasiwiti bilen,  eshshati musapirlar lagéri ahalisi we tughqanliri bilen héytlishishqa barghan heniyye ailisining mashinisigha hujum qilghan.

hamas bayanat élan qilip,  heniyye ailisining lagér ahalisi we tughqanlirining héytini tebriklesh üchün yolgha chiqqan mashinidiki ezalirining bezilirining qaza qilghanliqi,  yene bezilirining yarilanghanliqini bildürdi.

bayanatta, roza héytning birinchi küni qorqunchaqlarche sadir qilinghan qebih hujumda, heniyyening hazim, emir we muhemmed isimlik üch oghli bilen muna, emel, xalid we rezzan isimlik newrilirining hayatidin ayrilghanliqi qeyt qilindi.

bayanatta yene, bu xil hujumlarning hamas we pelestin xelqining qarshiliq körsitish iradisini boshashturalmaydighanliqi؛ eksiche, ularning küresh iradisini tawlaydighanliqi tekitlendi.

bu jeryanda, ismail heniyyening israiliyening oghulliri we newriliri olturghan mashinigha hujum qilishidin kéyin élan qilghan bayanati eljezire qanilida élan qilindi.

«balilirimning shéhit bolghanliqi üchün, allahqa shükür qilimen» dégen heniyye, sözini dawamlashturup: «balilirim ghezzede turdi we ghezzedin ayrilmidi. xelqimizning hemmisi balilirining qéni bilen nurghun bedel tölewatidu؛ menmu ularning biri» dégenlerni qeyt qildi.

israiliyening rehberlerning balilirini zerbe obyékti qilish arqiliq pelestinliklerning iradisini sundurimiz dep oylap qalghanliqini, emma tökülgen bu qanlarning pelestin zéminigha bolghan sadaqetni mustehkemleydighanliqini otturigha qoyghan heniyye: «ailemning 60 qa yéqin ezasi urushta shéhit boldi؛ ular bilen xelqimizning héchqandaq perqi yoq. töligen bedellirimizning qanchilik éghir bolushidin qetiynezer, israiliyening pursetperestliklirige bash egmeymiz, yol qoymaymiz» dédi.

u yene «israiliyening musapirlargha tolghan refah shehirini ishghal qilish tehditi pelestin xelqini we  qarshiliq körsitish herikitini qorqutalmaydu» dégenlerni sözlirige ilawe qildi.