blinkén: biz hazirqi ehwalda refahqa hujum qilishqa qarshi

türkiye awazi radiyosi xewiri: amérika tashqi ishlar ministiri antoni blinkén engliye tashqi ishlar weziri dawid kaméron bilen washingtonda körüshkendin kéyin ötküzülgen axbarat élan qilish yighinida, ghezze weziyiti üstide toxtaldi.

u isirailiyening puqralarning qoghdashqa munasiwetlik qobul qilghili bolidighan bir pilani bolmay turup, refahni ishghal qilishigha qarshi ikenliklirini, bu mesile üstide isirailiyening munasiwetlik rehberliri bilen alaqe qiliwatqanliqlirini bildürdi.

u isirailiye bash ministiri nétanyahuning, «refahqa quruqluqtin hujum qilish waqtining békitilgenliki» toghrisidiki bayanati heqqide soralghan soalgha:

«qolimizda refah herikitige munasiwetlik békitilgen waqit yoq, yeni isirailiyening bizge bildürgen waqti yoq» dep jawab berdi.

u her qétim isirailiye dairiliri bilen körüshkende, puqralarni qoghdash mesuliyitining barliqini tekitlewatqanliqlirini, isirailiyening wekiller ömiki bilen uchrishish ötküzülmey turup, refah shehirige hujum qilishning bashlinishini kütmeydighanliqlirini qeyt qildi.

u isirailiye wekiller ömikining kéler hepte washingtongha kélishi mumkinlikini eskertti.

u isirailiyening ghezzege insanperwerlik yardemlirini toshuydighan yük aptomobilliri sanini köpeytishke ruxset qilghanliqidin memnunluq hés qilghanliqlirini we yardemlerni köpeytishke tirishiwatqanliqlirini bildürdi.

u yene, isirailiye bilen hamas otturisida baldurraq urush toxtitish mesiliside kélishim hasil qilinishini, esirlerning qoyup bérilishini we insanperwerlik yardemlirining köpeytilishini xalaydighanliqlirini tekitlep, hazirning özide bularning aldin ehmiyet béridighan mesililer ikenlikini qeyt qildi.