israiliyening hujumlirida hayatidin ayrilghan pelestinlikler sani 33 mingdin ashti
ghezzege ölüm yaghdurushni dawamlashturuwatqan israiliye, birleshken döletler teshkilati (b d t) xewpsizlik kéngishining 25-marttiki urush toxtitish qararigha boysunmay, hujumlirini dawamlashturmaqta.
türkiye awazi radiyosi xewiri: israiliye armiyesining 2023-yili 7-öktebirdin buyan dawam qiliwatqan ghezze hujumlirida hayatidin ayrilghan pelestinlikler sani 33 mingdin, yarilanghanlar sani 75 mingdin éship ketti.
sehiye xizmetliri we dawalinish pursetlirige érishelmigen ghezzelikler azab-uqubet tartishni dawamlashturmaqta. refah shehiridiki bir qisim doxturxanilar yéngi kelgen bimarlarni dawalash imkaniyetliridin mehrum qalmaqta. refahtiki börek késellikliri bimarliri doxturxanilarda orun bolmighachqa, yéqin etraptiki bir toy zaligha yötkeldi.
ghezzede xelqaraliq yardem bérish organliri xadimlirining öltürülüshige munasiwetlik bes-munazirelermu dawamlashmaqta؛ b d t xewpsizlik kéngishi israiliye xelqara yardem orginining yette xizmetchisini öltürgendin kéyin yighin chaqirip, israiliyening hujumlirini tenqidlidi.
israiliye armiyesi jawabkarliqini qobul qilip, ikki neper yuqiri derijilik ofétsirni xizmettin boshatti. emma, israiliyening ongchil éqimdiki ministiri bén gwir ishtin boshitishqa qarshi turup: «xataliq sadir qilinghan teqdirdimu, eskerlerni sotlimasliq kérek» dédi.
yene bir tereptin, israiliye teripidin élan qilinghan yardem xadimlirining öltürülüshi toghrisidiki doklatni «yéterlik»dep qarighan amérika qoshma ishtatliri: «bizning musteqil tekshürüsh pilanimiz yoq» dédi.
