jo baydin bilen shi jinping téléfonda muhim mesilerni muzakirileshti

türkiye awazi radiyosi xewiri: aqsaray yazma bayanat élan qilip, baydin bilen shining téléfonda körüshkenlikini bildürdi.

bayanatta bildürülishiche, baydin bilen shi ikki dölet armiyesi otturisidiki hemkarliq, zeherlik chékimlikke qarshi küresh, süniy eqilge munasiwetlik mesililer we kilimat özgirishi qatarliq nurghunlighan témilarni muzakire qilghan.

söhbette, baydin shi jinpinggha teywen boghuzidiki tinchliq we muqimliqning muhimliqini eskertish bilen birge, jenubiy déngizdimu erkin seper qilish we qanunning üstünlüki pirinsiplirini qoghdash kéreklikini tekitligen.

baydin rusiyening mudapie sanaiti ul-eslihelirige xitayning yardem qiliwatqanliqidin we buning yawropagha shundaqla atlantik okyanning bixeterlikige bolghan selbiy tesiridin endishe qilidighanliqlirini uqturghan.

baydin yene, amérika bilen xitay otturisidiki soda riqabitide xitay yolgha qoyuwatqan «adaletsiz soda ijraatliri» nimu küntertipke élip kélip, buning amérikaliq ishchilargha shundaqla amérikaliq déhqanlargha ziyan salghanliqini tekitligen.

xitay tashqi ishlar ministirliqi teripidin élan qilinghan bayanatta körsitilishiche, baydinning telipige binaen ötküzülgen téléfon söhbitide, ikki rehber «xitay-amérika munasiwetliri we ortaq menpeet mesilisi» toghrisida pikir almashturghan.

shi jinping teywen mesilisining xitay-amérika munasiwetliri xilapliq qilmasliqi kérek bolghan «birinchi qizil siziq» ikenlikini tekitlep: «teywenning musteqilliqini nishan qilghan bölgünchilik paaliyetliri shundaqla bularning sirttin righbetlendürülishi we qollap quwwetlinishi aldida qol qowushturup qarap turalmaymiz» dégen.

xitay rehbiri shi jinping yene, amérikaning künséri téximu köp xitay shirketlirini imbargo tizimlikige kirgüzüwatqanliqini eskertip, «bu xeterni yoqitish emes, belki yéngi xeterlerni peyda qilghanliqtur» dégen.

shi bilen baydin ukraina kirizisi we koréye yérim arilining weziyiti toghrisidimu pikir almashturghan.

xitay rehbiri söhbette yene, dölitining xongkong mesilisi, kishilik hoquq, jenubiy déngiz we bashqa mesililerge tutqan meydanini baydingha yetküzgen.