rusiye: hujumning arqisida amérika, engliye we ukraina bar

türkiye awazi radiyosi xewiri: fédératsiye bixeterlik idarisi diréktori aléksandir bortnikow rusiye bash teptish mehkimisining kéngeytilgen yighinidin kéyin, bayanat élan qildi.

u moskwadiki térrorluq hujumining perde arqisida, amérika, engliye we ukrainaning bar-yoqluqi toghrisidiki soalgha, «biz shundaq dep oylaymiz. yüz bergen pajie toghrisida toxtiliwatimiz. bu omumiy uchur, emma ulargha köp paydiliq boldi» dep jawab berdi.

u térrorluq hujumini peyda qilghanlarning ukraina tewelikige ötüp kétishni pilanlighanliqlirini eskertip, bularni ukraina zéminida kütüp turghan kishilerning barlqigha munasiwetlik deslepki yip uchigha ige ikenliklirini bildürdi.

u térrorluq hujumining pilanlighuchisining téxi éniqlanmighanliqini, ukrainaning ottura sherqte qoralliq küchlerni terbiyeligenlikini we rusiyege qarshi septe oxshimighan milletlerdin bolghan jengchilerning bolushining buning ispati ikenlikini qeyt qildi.

u amérikaning rusiyege qarshi térrorluq hujumi yüz bérish éhtimalliqi toghrisida uchur bergenlikini we buning nezerge élinghanliqini, emma uchurning omumiy xaraktérge ige ikenlikini bayan qildi.

u rusiyening moskwadiki térrorluq hujumigha inkas qayturidighanliqini eskertip, bu hujumgha chétishliq her bir kishining tépilip, qattiq jazalinidighanliqini tekitlidi.

u dölet ichide térrorluq xewpining hélimu dawam qiliwatqanliqini körsitip, ukraina bixeterlik idarisi (SBU) ning térrorluq hujumi peyda qilishining aldi éliniwatqanliqini bildürdi we  ukraina bixeterlik idarisini «térrorluq teshkilati» dep étirap qilish kéreklikini otturigha qoydi.

u buningdin bashqa, ukraina herbiy ishlar istixbarat bashliqi kiril budanof we bashqa istixbarat xadimliri toghrisidiki soalgha, «rusiye we rusiye puqralirigha qarshi jinayet sadir qilghanlar qanunluq hujum nishanidur» dep jawab berdi.

u bu nishanlargha néme üchün zerbe bérilmigenliki toghrisidiki soalgha jawab bergende, buning emelge ashidighanliqini eskertti.

paytext moskwada yüz bergen térrorluq hujumida 139 kishining jénidin ayrilip, 100 din artuq kishining yarilanghanliqi élan qilindi.

rusiye prézidénti wladimir putin hujumni sadir qilghan töt térrorchini öz ichige alghan 11 kishining tutulghanliqini uqturghan idi.