yawropa ittipaqi rehberliri tonglitilghan rusiye mal-mülüklirining kirimini ukraina bérishke kélishti
yawropa ittipaqi komitéti reisi ursula won dér léyén, ittipaqqa eza döletlerning rehberlirining tonglitilghan rusiye mal-mülkidin qilinghan kirimni ukrainagha bérish mesiliside birdeklik hasil qilghanliqini bildürdi.
türkiye awazi radiyosi xewiri: bélgiyening paytexti biryussélda ötküzülgen yawropa ittipaqi bashliqlar yighinining birinchi küni axirlashti؛ yawropa ittipaqi komitéti reisi won dér léyén yighinning axirida ötküzülgen muxbirlarni kütüwélish yighinida, bashliqlar yighinining ukrainagha munasiwetlik bölikining netijisini ortaqlashti.
u rehberlerning yawropa ittipaqining tashqi munasiwet we bixeterlik siyasiti boyiche aliy wekili josép borrélning <rusiyening yawropa ittipaqi tewelikidiki tonglitilghan mal-mülükliridin qilinghan kirimni ukrainagha bérish> toghrisidiki teklipining muwapiq dep qaralghanliqini bildürüp: «bu ukrainani herbiy eslihelerni sétiwélish meblighi bilen teminleydu. 2024-yili 3 milyard yawro etrapida, kelgüsi bir nechche yildimu yene mushunchilik mebleghning toplinishini mölcherlimektimiz» dédi.
won dér léyén bu teklipning qachan yolgha qoyulidighanliqi toghrisidiki soalgha: «men rehberlerge bu teklipni derhal xulasilisek, 7-ayning 1-küni aldinqi 1 milyard yawroni béreleydighanliqimizni éyttim. démek, bu ish bizge baghliq. téz bolsaq bolidu, u (ish) bizning qolimizda. yazda konkrét heriket bolidu» dep jawab berdi.
