isirailiyening refahni bombardiman qilishni bashlighanliqi bildürüldi
pelestin isirailiye armiyesining ghezzening jenubigha jaylashqan refah shehirige tünügün (18-mart) hujum qilghanliqini, hujumda kichik balilar we ayallarni öz ichige alghan 14 pelestinlikning jénidin ayrilghanliqini élan qildi.
türkiye awazi radiyosi xewiri: pelestin tashqi ishlar ministirliqi isirailiyening refah shehirige hujum qilghanliqi toghrisida yazma bayanat élan qildi.
bayanatta: «pelestin tashqi ishlar ministirliqi isirailiyening ghezzening shimaliy we merkizidin öy-makanliridin ayrilishqa mejbur bolghan milyonlarche kishi bolghan refah shehirini ishghal qilmasliq toghrisidiki xelqaraliq agahlandurushlargha qarimastin qilghan hawa hujumini hemde sistémiliq halda dawamlashturuwatqan herbiy heriketlirini qattiq eyibleymiz» déyildi.
isirailiyening tünügün kechte refahni qattiq bombardiman qilishni bashlighanliqi, bombardimanda nurghun pelestinlikning jénidin ayrilghanliqi tekitlengen bayanatta mundaq déyildi:
«isirailiye refah shehirige hujum qilishni bashlidi. xelqaraliq naraziliqlardin özini qachurush üchün hujumni élan qilmidi we héchkimning ruxset qilishinimu kütmidi.»
bayanatta qeyt qilinishiche, isirailiye ayropilanliri tünügün kéche refah shehirining oxshimighan rayonlirini hawadin bombardiman qilip, kichik balilar we ayallarni öz ichige alghan 14 kishining ölümige, nurghun kishilerning yarilinishigha seweb bolghan.
isirailiye bash ministirliq ishxansining 15-marttiki bayanatida, refah shehirining jenubida herbiy heriket bashlash pilanining testiqlanghanliqi uqturulghan idi.
isirailiye armiyesi insanperwerlik yardemlirining yetküzülüshige tosqunluq qilip, acharchiliqning yüz bérishige seweb bolghan ghezzede 7-öktebir (2023) din buyan qiliniwatqan hujumlarda yéqinqi 24 saette jénidin ayrilghanlar sani 93 kishi éship, 31 ming 819 gha yetti.
