хитай: русийә қатнашмиған йиғинларни байқут қилимиз
хитай йавропа дипломатлирини русийә қатнашмиған әһвалда украинаға мунасивәтлик хәлқаралиқ учришишларни байқут қилидиғанлиқи тоғрисида агаһландурди.
түркийә авази радийоси хәвири: «политико гезити» ниң хәвиридә билдүрүлишичә, хитайниң йавро-асийа ишлириға мәсул вәкили ли хуй март ейида кийевни өз ичигә алған һалда йавропа дөләтлирини зийарәт қилип, шивейтсарийәдә ечилиши пилан қилинған «тинчлиқ формуласи» конферанси тоғрисидики шәртлирини йәткүзгән.
хитай ташқи ишлар министирлиқиму байанат елан қилип, конферансқа русийә федератсийәси вә украина вәкиллири қатнашқан әһвалда, хитайниңму иштирак қилидиғанлиқини билдүргән.
хәвәрдә әскәртилишичә, май (2024) ейида хитай рәиси ши җинпиң йавропа зийаритини башлайдиған болуп, бейҗиң билән йавропа иттипақи мунасивәтлирини, болупму сода саһәсидики мунасивәтлирини оңшашни мәқсәт қилидикән. зийарәт рамкисида, хитай-йавропа иттипақи мунасивәтлириниң 60-йиллиқи шәрипигә бир қатар мурасимлар өткүзүлидикән.
украина йанвар (2024) да давос мунбири йиғинида «тинчлиқ формуласи» ни тәрәққий қилдуруш үчүн бәзи алий дәриҗилик йиғинларниң ечилишини тәләп қилған иди. «тинчлиқ формуласи» ниң йаз айлирида ечилиши пилан қилинған иди. украина йиғинға русийә вәкиллириниң қатнишишиға қарши чиққан болуп, иккинчи қетимлиқ йиғинда русийә вәкиллирини тәклип қилишни қоллиған иди.
украина пирезиденти володимир зеленский москваниң йиғинға чақирилиш мумкинликини, әмма буниң пәқәт тәййарланған тинчлиқ пиланини йәткүзүш үчүн болуши мумкинликини қәйт қилған иди.
украина 1961-йилдики чеграларни қобул қилишни, русийә армийәсиниң қиримни өз ичигә алған украинаниң барлиқ ишғал қилинған земинлиридин чиқип кетишини тәләп қилиду. русийә болса, бу шәртләрниң әмәлгә ашмайдиғанлиқини, қошувелинған қирим, донетск, херсон вә запорижйа қатарлиқ районларниң салаһийитини талаш-тартиш қилишқа болмайдиғанлиқини илгири сүрмәктә.
шивейтсарийә ташқи ишлар министири игназийо кассис «тинчлиқ формуласи» ға хитайни чақиришни тәклип қилған иди. хитай бу тәклипкә қарита, йиғинға икки тәрәп вәкиллири чақирилмиған әһвалда «қуруқ параң» ға айлинидиғанлиқи тоғрисида агаһландурушта болди.
русийә ташқи ишлар министири сергей лавров бу ай (2024-йил март) ниң бешида хитай вәкили ли хуй билән көрүшкәндә, москваниң украина билән ринчлиқ сөһбити өткүзүшкә тәййар икәнликини вә «тинчлиқ формуласи» ға мунасивәтлик барлиқ паалийәтләрдә чоқум русийәниң болуши керәкликини ейтқан иди.
