parashot bilen tashlanghan insanperwerlik yardimimu pelestinliklerning ölümige seweb boldi
ghezzening shimalida hawadin tashlanghan insanperwerlik yardimini élishqa tirishqan pelestinlikler otturisida yüz bergen qisti – qistangchiliq sewebidin bir kishi qaza qilip, bezi kishiler yarilandi.
türkiye awazi radiyosi xewiri: nurghunlighan pelestinlikler shimaldiki beyt lahiyagha ayropilanlardin parashot bilen tashlanghan yardemlerni élish üchün rayongha sel bolup aqti.
sehiye menbeliridin igilengen uchurlargha asaslanghanda, yüz bergen qisti – qistangchiliqta bir pelestinlik qaza qilip, beziliri yarilanghan.
yarilanghanlarning sani toghrisida hazirche héchqandaq melumat bérilmidi.
israiliye 2023-yili 7 – öktebirdin buyan ghezzege wehshiylerche hujumlirini dawamlashturup, ghezzede yashaydighan 2 milyon 300 ming pelestinlikni acharchiliqqa mehkum qilmaqta.
birleshken döletler teshkilati pelestinlik panahlanghuchilargha yardem bérish we mulazimet qilish orgini 10-martta élan qilghan bayanatida, israiliyening 17 yildin béri qorshawda tutup kelgen ghezze rayonida «hemme yerni acharchiliq qaplap ketken» liki bildürülgen idi.
b d t ghezze rayonida 2 milyon 200 ming kishining israiliyening wehshiylerche hujumliri tüpeyli acharchiliq xewipige duch kelgenliki heqqide agahlandurushta bolghan idi. ghezze rayonidiki acharchiliq we ozuqluq yétishmeslik sewebidin qaza qilghanlar sanining 27 kishige örligenliki bildürülgen idi.
israiliyening 7 - öktebirdin buyan ghezze rayonigha qilghan wehshiylerche hujumlirida az dégende 13 ming 500 kichik bala we 9 ming ayalni qoshqanda, jemiy 31 ming 553 pelestinlik öltürüldi hemde 73 ming 546 pelestinlik yarilandi.
