ghezzede öltürülgen kichik balilarning sani xelqarani chöchütti
7-öktebir (2023) din buyan israiliyening ghezze rayonigha qaratqan wehshiylerche hujumlirida öltürülgen kichik balilar sanining, yéqinqi 4 yilda dunya miqyasidiki urushlarda öltürülgen kichik balilar omumiy sanidinmu yuqiri ikenliki bildürüldi.
türkiye awazi radiyosi xewiri: birleshken döletler teshkilati yéqin sherqtiki pelestinlik panahlanghuchilargha yardem bérish we xizmet qilish orgini (UNRWA) ning bash komissari filip lazzarini X ijtimaiy alaqe adrésida, israiliyening ghezzediki wehshiylerche hujumlirida öltürülgen kichik balilar toghrisidiki sanliq melumatlarni hembehrlidi.
ghezzede israiliye teripidin öltürülgen kichik balilargha munasiwetlik istatistikiliq melumatqa qarita «insanni chöchitidighan» dep baha bergen filip lazzarini, israiliyening 7 - öktebirdin buyanqi hujumlirining asasliq nishani bolghan ghezze rayonida öltürülgen kichik balilar sanining yéqinqi 4 yilda dunya miqyasidiki urushlarda öltürülgen kichik balilar omumiy sanidinmu yuqiri ikenlikini éytti.
lazzarini: «bu kichik balilar üstidin dawamlashturuluwatqan urushtur, kichik balilarning kelgüsi üstide élip bériliwatqan urushtur» dédi.
ghezze rayonida israiliye teripidin texminen 31 ming puqra öltürülgen bolup, bularning ichide 12 ming nepiri kichik balilar idi.
