jo baydin: «nétanyahu emdilikte israiliyege paydidin bekrek ziyan yetküziwatidu»
amérika pirézidénti jo baydin rafah chégra éghizining özige nisbeten bir «qizil siziq» ikenlikini tekitlep, israiliye bash ministiri bényamin nétanyahuning «israiliyege emdilikte paydidin köp ziyan yetküziwatqanliqini» éytti.
türkiye awazi radiyosi xewiri: amérika pirézidénti jo baydin <MSNBC> qanilida tarqitilghan bir programmining ziyaritini qobul qilip, kün tertiptiki asasliq témilar üstide toxtaldi.
jo baydin nétanyahuning ghezzediki hujumliri we bu hujumlarda öltürülgen 30 mingdin artuq puqraning mesuliyitining éghir ikenlikini tilgha élip, bunche insanlarning peqet hamasni qoghlash üchünla öltürülüshke bolmaydighanliqini tekitlidi.
jo baydin, «bash ministir bényamin nétanyahugha qarita qizil siziqingiz néme? birer qizil siziqingiz barmu? mesilen؛ rafahni ishghal qilish bir qizil siziq bolalamdu?» dégen soalgha jawab bérip, «bu bir qizil siziqtur. emma hergizmu israiliyeni tashlimaymiz. israiliyening mudapiesi yenila halqiliq ehmiyetke ige» dédi.
baydin nétanyahuning emdilikte israiliyege paydidin köp ziyan élip kéliwatqanliqini tilgha élip, ghezzede öltürülgenler sanining intayin köp ikenlikini, nétanyahu hökümitining «qandaq qilghanda puqralarning hayatini hujum nishani qilmaymiz?» dégen mesilige jiddiy ehmiyet bérishi kéreklikini tekitlidi.
