xusiylar zerbe bérishni éghirlashturidighanliqi toghrisida tehdit saldi
yemende iran qollawatqan xusiylarning rehbiri abdulmelik elxusiy qizil déngiz, eden qoltuqi we babul mendebtin ötken isirailiye, amérika we engliye paraxotlirigha zerbe bérishni ashuridighanliqlirini éytip tehdit saldi.
türkiye awazi radiyosi xewiri: xusiylarning rehbiri abdulmelik elxusiy «elmesire» téléwiziyeside, ghezzeni qollash üchün qizil déngizda we eden qoltuqida qilinghan heriketler toghrisida melumat élan qildi.
u: «isirailiye ghezzege hujum bashlighandin buyan qizil déngiz we oman déngizida, isirailiye, amérika we engliyening 48 paraxotigha zerbe berduq» dédi.
u qizil déngiz, eden qoltuqi we babulmendebte zerbe bérish heriketlirining dawamlishish bilen birge, zerbe bérishni téximu ashurushqa tirishidighanliqlirini bildürdi.
u qizil déngiz bilen ereb déngizidiki herbiy heriketlerge «su asti qorallirini» mu qoshqanliqini eskertip, buning düshmenlerni qorqitidighanliqini qeyt qildi.
u sözini dawamlashturup, mundaq dédi:
«ghezze hujum bashlanghandin buyan ishghal astida turuwatqan pelestin zéminliridiki isirailiye nuqtilirigha 183 bashqurulidighan bomba étildi, uchqular bilen hujum qilindi.»
u amérikani ghezzediki pelestin xelqini acharchiliqqa duchar qilish üchün isirailiyeni küchlük qollash bilen eyiblidi.
«elmesire» téléwiziyesining xewiride, amérika we engliye ayropilanlirining hudeydening gherbige jaylashqan eljebbane rayonini töt qétim bombardiman qilghanliqi bildürülgen idi.
yemende iranning qollishi astidiki xusiylar 31-öktebir (2023) din tartip isirailiyening ghezzediki hujumlirigha jawab qayturushni seweb qilip, yemen déngiz tewelikide isirailiye shirketlirige chétishliqi barliqini ilgiri sürgen soda paraxotlirini musadire qilishni, bezilirige uchqu we bashqurulidighan bombilar bilen hujum qilishni bashlighan idi.
amérika herbiy qisimliri nurghun qétim yemendin étilghan bashqurulidighan bomba we uchqularning étip chüshürülgenlikini élan qilghan idi.
nurghun xelqaraliq déngiz tiransport shirketliri xusiylarning hujumliri sewebidin qizil déngizdiki paraxot qatnishini bikar qildi.
dunya sodisining texminen %12 i aqdéngizni qizil déngizgha tutashturup, yawropa bilen asiya otturisidiki musapini qisqartidighan süweyish qanili arqiliq emelge ashidu.
